– Республикала яңы балалар баҡсалары һәм мәктәптәр демографик хәлдән сығып ҡына төҙөләсәк, – тип белдерҙе Башҡортостан Мәғариф министрлығы коллегияһының киңәйтелгән ултырышында республика Хөкүмәте Премьер-министры урынбаҫары Салауат Сәғитов. – Ауыл йәки ҡаланың киләсәге бар икән, төҙөйәсәкбеҙ, әлбиттә. Ләкин буш торған биналар булмаҫҡа тейеш. Былтыр федераль программа буйынса Стәрлетамаҡта һәм Федоровка районында ике мәктәп һалынды.
Мәғариф учреждениелары төҙөү темаһын дауам итеп, Салауат Сәғитов, проекттарҙы мөмкинлектәр менән яраштырыу мөһим, тип билдәләне. Атап әйткәндә, был бассейндарға ҡағыла.
– Дәрес оҙайлылығы – 45 минут, шуның 15 минуты кейем алмаштырыуға китә, балалар һыуҙа ни бары 15 минут үткәрә, ҡалған ваҡыт кибенеүгә сарыфлана. Был ваҡыт эсендә йөҙөргә өйрәнеп булмай. Шул уҡ ваҡытта физкультура-һауыҡтырыу комплекстары тулы ҡеүәтенә эшләмәй. Бына шуларҙы файҙаланырға кәрәк, – тигән фекерҙә Хөкүмәт Премьер-министры урынбаҫары.
Салауат Сәғитов әйтеүенсә, быйыл Башҡортостанға Өфөнөң “Дим-8” һәм “Колгуев” биҫтәләрендә ике мәктәп төҙөүгә 773 миллион һум аҡса бүленәсәк.
Вице-премьер иғтибарҙы йүнәлткән тағы ла бер мәсьәлә – уҡыусыларҙың олимпиада хәрәкәте. Ҡеүәтебеҙ ҙур булһа ла, мәҫәлән, Пермь һәм Екатеринбург менән сағыштырғанда, бындай бәйгеләрҙә еңгән уҡыусылар һаны буйынса байтаҡҡа ҡалышабыҙ. Мәғариф министрлығына төп юғары уҡыу йорттары менән берлектә эшләргә кәрәк. Ошо йүнәлештә эш итеүҙең махсус программаһын төҙөү шарт, тигән бурыс ҡуйылды коллегияла.
Эшсе кадрҙар әҙерләү мәсьәләһе лә бик мөһим. Күптән түгел үткәрелгән WorldSkills һәм JuniorSkills төбәк чемпионаты ла ҡайһы бер проблемаларҙы асты. Беҙ уларға даими иғтибар бирергә тейешбеҙ. Ярыштарға килгән ҡатнашыусыларҙың күбеһе, мәсьәләләргә күҙ һалғандан һуң, уларҙы сисә алмаясағын белдерҙе. Яҡын арала урта махсус уҡыу йорттарын үҫтереү программаһын төҙөргә кәрәк. Бындай уҡыу йорттары республиканың мәғариф системаһында мөһим звеноға әүерелергә тейеш, тип билдәләне Салауат Сәғитов.
Бынан тыш, Хөкүмәт Премьер-министры урынбаҫары юғары уҡыу йорттарын тамамлаусылар һанының йылдан-йыл артыуы хаҡында әйтте. Кәңәшмәлә билдә­ләнеүенсә, бөгөн юғары белемле түгел, ә техникум тамамлап эшсе һөнәренә эйә булған йәштәр етмәй. Японияла, Германияла халыҡтың 22 проценты ғына юғары белемле, ҡалғандары – квалификациялы эшселәр. Беҙгә иң элек ата-әсәләргә юғары белемдең тормошта уңыштың төп шарты түгеллеген еткерергә кәрәк. Ә балаларға иһә эшсенең станок артында ғына тормауын, программаларҙы үҙе яҙып, һуңынан улар буйынса эшләүен аңлатыу зарур.
WorldSkills – донъя кимәле. Беҙ уға ынтылырға тейешбеҙ. Рәсәйҙең Мәғариф һәм фән министрлығы мәғлүмәттәренә ярашлы, илебеҙҙәге урта махсус уҡыу йорттарын тамамлаусыларҙың ни бары 500-ө генә донъя кимәленә тап килә. Улар араһында республикабыҙҙан бер кеше – Сибай күп профилле һөнәри колледжы студенты Рафаэль Яхин бар. Ул “Йәш профессионалдар” (WorldSkills Russia) милли чемпионаты финалында ҡатнашты.