Федерация Советының социаль сәйәсәт буйынса комитеты рәйесе Валерий Рязанский белдереүенсә, электрон тәмәке лә, никотинлыһы кеүек, һаулыҡҡа берҙәй зыян килтерә һәм илебеҙҙә уны һатыуҙы көйләүсе махсус регламент булырға тейеш.
“Был продукт, – тип борсола Рязанский, – ҡәҙимге тәмәкегә альтернатива ғына булып тора, ул бер нисек тә никотинды алмаштырыусы зыянһыҙ ғәмәл йәки тәмәке тар­тыу­ҙан ҡотола торған ысул түгел. Етештереүсе лә иҫкәртә: электрон тәмәке никотинлыға тиң. Шул уҡ ваҡытта ул иркен һатыуҙа, сик­ләү­ҙәр юҡ. Электрон тәмәкене тартыу­ҙың регламенты булмағас, тимәк, һатыу даирәһе лә киңәйгәндән-киңәйә барасаҡ, сөнки етеште­реүсегә тауарын таратыу зарур”.
Әйткәндәй, Рәсәйҙең Финанс һәм Һаулыҡ һаҡлау министрлыҡтары тәмәке тартыуға ҡаршы 2022 йылға тиклемге концепция проекты буйынса уртаҡ фекергә килә алмаған. Сәбәбе – документта тәмәкегә акциздарҙы күтәреү һәм өҫтәмә һалымдар индереү кеүек талаптар­ҙың булыуы. Проектта шулай уҡ электрон тәмәкене ҡәҙимге тәмәкегә тиңләү, тартыу тыйылған урындар­ҙың исемлеген киңәйтеү, 2015 йылдан һуң тыуғандарға тәмәке һа­тыуҙы бөтөнләй рөхсәт итмәү (хатта бәлиғ булғас та) кеүек тәҡдимдәр ҙә бар.