Республика Башлығы Рөстәм Хәмитов Башҡорт дәүләт университеты студенттары менән осрашты, уларҙы Рәсәй студенттары көнө менән ҡотланы.Осрашыу башланыр алдынан юғары уҡыу йортоноң физика-математика корпусында республика етәксеһе БДУ студенттарының ғилми ҡаҙаныштарына һәм ижадына арналған “Татьяна көнө” күргәҙмәһен ҡарап сыҡты. Үҙенең сығышында ул республиканың социаль-иҡтисади үҫеше, фәнни-техник прогресс, йәштәрҙең башланғыстарына булышлыҡ итеү, мәғариф системаһын камиллаштырыу мәсьәләләрен күтәрҙе.
– Беҙгә бергәләп республикабыҙҙы донъяуи мәсьәләләрҙе хәл итеүгә йәлеп итеү буйынса эште алып барыу шарт. Төбәктең оҙаҡ ваҡыт тышҡы донъянан айырымланыуы сер түгел. Был эшҡыуарлыҡты, иҡтисадты, тотош йәмғиәтте үҫтереүгә ҡағыла, – тине Рөстәм Зәки улы. – Мәҫәлән, беҙ БДУ-ға федераль университет статусын ала алманыҡ, республикала милли тикшеренеү университеттары ойоштороуға өлгәшмәнек. Был – ҙур етешһеҙлек, сөнки Башҡортостан юғары уҡыу йорттарын үҫтереү йәһәтенән конкурентлы мөхиттән төшөп ҡалды.
Студенттарҙың һорауҙарына яуап биреп, төбәк етәксеһе әле Башҡорт дәүләт университетына ошо статусты алыу йәһәтенән әүҙем эш алып барылыуын билдәләне. Бөгөн республикала Өфө дәүләт нефть техник университеты ғына шундай статусҡа эйә. Ул – “Газпром”дың терәк вузы. Ә М. Аҡмулла исемендәге Башҡорт дәүләт педагогия университетына терәк гуманитар вуз статусы бирелгән.
Өфөнө конгресс үҙәге булараҡ үҫтереүгә килгәндә, Башҡортостан Башлығы майҙа бында 70-80 ил вәкиле ҡатнашлығында донъяның социологик йәмғиәттәре етәкселәренең IV конгресын үткәреү ихтималлығы хаҡында әйтте. Киләсәктә был республикаға халыҡ-ара социологик форумдар уҙғарыуға дәғүә итеү мөмкинлеген бирәсәк.
Студенттар төбәк етәксеһенә биргән һорауҙар йәштәрҙең ҡаҙаныштарын производствоға индереүгә, мәшғүллеккә, йәмәғәт транспортына, экологияға, спортты һәм үҙешмәкәрлекте үҫтереүгә ҡағылды. Осрашыу аҙағында Рөстәм Хәмитов БДУ-ның геофизика кафедраһындағы термометрия лабораторияһында булды.