Киләһе йылдың 25 апреленән 18 майына тиклем XI класс уҡыусылары өсөн биология, география, тарих, химия һәм физика фәндәренән Бөтә Рәсәй тикшереү эше үткәреү планлаштырылды. Унда ҡатнашыу мотлаҡ түгел, ҡарарҙы һәр мәктәп коллективы үҙе ҡабул итә.
Педагогик үлсәүҙәрҙең федераль институты сайтында һынауҙың нисек уҙғарыласағы хаҡында мәғлүмәт, уның өлгөләре баҫылып сыҡты. Тикшереү эшен әлеге предметтарҙан БДИ тапшы­рырға йыйынмаған уҡыусылар өсөн үткәреү ҡаралған. Шуға ла һорауҙар дөйөм әҙерлекте билдәләүгә йүнәлтелгән.
Рәсәй гражданы тарих буйынса нимәләрҙе мотлаҡ белергә тейеш? Сәләмәт һәм хәүефһеҙ йәшәү рәүеше хаҡында тейешле мәғлүмәт туплағанмы? Тәбиғәткә бәйле дөйөм ғилемгә эйәме? Ошо һәм башҡа һорауҙарҙы аныҡлау күҙаллана.
Тикшереү эшен башҡарғанда белешмә материалдар (мәҫәлән, география буйынса атлас, химия һәм физиканан таблицалар) ҡулланырға мөмкин. Һынау ваҡыты – 90 минут.