Уңғандарҙы бүләкләү, эшһөйәрҙәрҙе дәртләндереү – республика етәкселегенең мөҡәддәс бурыстарының береһе. Ошо көндәрҙә Хөкүмәт йортонда бер төркөм хеҙмәт алдынғыларына дәүләт наградалары тапшырылды.
– Күркәм залға үҙ эшенең оҫталары һәм талант эйәләре йыйылған, – тине, Рөстәм Хәмитов исеменән ҡотлап, Башҡортостан Башлығы Хакимиәте етәксеһе Владимир Нагорный. – Һеҙ барҙа республикабыҙ тағы ла сағыуы­раҡ балҡыясаҡ, матурланасаҡ. Фиҙакәр хеҙмәтегеҙ менән килә­сәк быуынға өлгө күрһәтеүегеҙ маҡтауға лайыҡ, тимәк, беҙҙең киләсәгебеҙ – ышаныслы ҡулдарҙа.
Владимир Александрович белдереүенсә, Башҡортостан – Рәсәй өсөн ныҡлы терәк, респуб­ликабыҙ йылдан-йыл үҫешә, уның социаль-иҡтисади хәле яҡшыр­ған­дан-яҡшыра, төрлө проекттар уңышлы тормошҡа ашырыла. Күптән түгел генә баш ҡалабыҙҙа Перинаталь үҙәктең сафҡа индерелеүе, Затон күперенең асылыуы, төбәктең көньяғында электр станцияһының эшләй башлауы һәм башҡалар – шуға асыҡ миҫал.
Бүләкләнеүселәр араһында “Өфө моторҙар эшләү етештереү берекмәһе” йәмғиәте эшселәре күп кенә ине. Башҡортостандың атҡа­ҙанған машина төҙөүсеһе Андрей Веретенников етәксе­леккә рәхмә­тен еткерҙе, алдағы көндәрҙә лә бурыстарҙы теүәл үтәргә вәғәҙә бирҙе.
Рәми Ғарипов исемендәге 1-се Башҡорт республика гимназия-интернаты уҡытыусыһы Динә Фазыл­ғаяноваға “Башҡорт­остандың атҡаҙанған уҡытыу­сыһы” тигән маҡтаулы исем бирелде.
– Ғүмер буйы биология фәне­нән уҡыттым. Тәүге йылдарҙа ниндәй ҙә булһа бүләккә лайыҡ апай-ағайҙарға ҡарап һоҡлана торғайным, буй етмәҫлек хыял кеүек тойола ине. Йәшәү ул – үргә үрләү, тибеҙ, – ти Динә Ким ҡыҙы.
“Башҡортостан Республика­һының атҡаҙанған мәғариф хеҙмәт­кәре” исемен алған Әлшәй районы хакимиәтенең мәғариф бүлеге начальнигы Айҙар Солтан­ғоловтың һүҙҙәренә ҡарағанда, бынан да ҙур бүләктең булыуы мөмкин түгел, эшемә лайыҡлы баһа, ти ул. Ә Башҡортостан Башлығының Рәх­мәт хаты менән бүләкләнгән “Башҡортостан” теле­ра­дио­тапшы­рыуҙар компания­һының баш мөхәррире Шамил Ишемйәров иһә ҡотлауҙы үҙенең юбилейы айҡанлы бүләк тип ҡабул итте.