Рәсәй донъяла алюмин етештереү буйынса Ҡытайҙан ҡала икенсе урынға сыҡты. Әммә шуныһы ғәжәп: был металл үҙебеҙҙә бик аҙ ҡулланыла.


Быйыл Рәсәй, Һиндостан һәм Канада бер-береһе менән уҙышып тигәндәй алюмин етештереү күләмен арттырҙы. Шулай ҙа улар араһында беҙҙең ил, йыллыҡ сығарыуҙы 3,6 миллион тоннаға тиклем еткереп, иң шәбе булып танылды. Был – донъяла етеш­терел­гәндең ете проценты. Беренсе урында – Ҡытай. Улар донъялағы алюминдың 54 процентын ҡойған.
Әйткәндәй, Рәсәй алюми­нының күпселеге тиерлек экспортҡа оҙатыла. Ситкә һатылған металл араһында уның өлөшө 77 процент тәшкил итә. Быйыл беҙҙән алюминдың иң күбен АҠШ алған – уларға экспорттың сирек өлөшө тура килә. Икенсе урында – Япония (11 процент), өсөнсө – Төркиә (10 про­цент).
Шуныһы ғәжәп: Рәсәй бөтә донъяны алюмин менән тәь­мин итһә лә, әлегә үҙебеҙҙә сы­ға­рылғанының бик аҙ өлөшө генә файҙа­ланыла. Дөйөм алғанда, Рәсәйгә һәм БДБ илдәренә уға ихтыяж бер процент ҡына тәшкил итә. Шул уҡ ваҡытта һуңғы биш йылда донъя­ла уға һорау 1,5 тапҡырға артҡан.
Күҙәтеүселәр билдәләүен­сә, был хәлде төҙәтеү өсөн юғары технологиялы етеште­реү­ҙе, айырыуса ауыр машиналар төҙөлө­шөндә һәм авиация сәнәғәтендә етди күтә­релеш кәрәк. Бынан тыш, Рәсәйҙә төҙөлөштә лә алюмин бөтөнләй ҡулланылмай тиерлек. Бындай конструкциялар ҡыйбат торһа ла, оҙаҡ йылдар һаҡланыуы менән отошло.