Башҡорт режиссеры Вилүрә Иҫәндәүләтованың “Тәүбә” фильмы (сценарий авторы – Мәғәфүр Тимербулатов, продюсеры – Азамат Хужәхмәтов) Абхазияның баш ҡалаһы Сухумиҙа 19-24 ноябрҙә уҙғарыласаҡ Х “Кунаки” Бөтә Рәсәй асыҡ кино һәм телевидение фестиваленең конкурс программаһына индерелде. Был турала “Башҡортостан” киностудияһы мөхәррире Дамир Йосопов хәбәр итте.
Фестивалдә нигеҙҙә ҡыҫҡа һәм тулы метражлы фильмдар ҡатнаша ине. Быйыл иһә беренсе тапҡыр унда ҡыҫҡа метражлы уйын һәм анимациялы картиналар тәҡдим ителәсәк. Сарала ҡатнашыуға 260-тан ашыу ғариза бирелгән. Программала иһә 60-ҡа яҡын фильм иҫәпләнә. Улар араһында ҡат­марлы тормош юлы үткән һәм тыуған ауылында имам-хатиб булып киткән кешенең ауыр яҙмышы хаҡында һөйләгән башҡорт режиссерының карти­наһы ла бар.
Фестиваль барышында шулай уҡ оҫталыҡ дәрес­тәре, “тү­ңә­рәк өҫтәл”дәр, билдәле мәҙә­ниәт һәм сәнғәт вәкилдәре ме­нән осрашыуҙар, ҡунаҡсыл Аб­ха­зияның иҫтәлекле урындары буйлап экскурсиялар ойош­то­роласаҡ. Сара Рә­сәй­ҙең Милли хәйриә фонды һәм Абхазия Хөкүмәте ярҙамы менән уҙға­рыла.
Әйткәндәй, “Башҡорт­остан” киностудияһының “Тәүбә” фильмы күптән түгел генә Бешкәктә төп бүләк­тәрҙең береһен яула­ғайны. Бынан тыш, ул 2015 йылда II “Көмөш Аҡбуҙат” халыҡ-ара милли һәм этник кино фес­тивалендә “Иң яҡшы документаль фильм геройы өсөн” тигән номинацияла призға лайыҡ булды.