Баш ҡалабыҙҙа “Дөйөм белем биреү буйынса Федераль дәүләт стандартын тормошҡа ашырыу: этномәҙәни һәм милли үҙенсәлектәрҙе үҙ эсенә алған идарауи аспект” тип исемләнгән Бөтә Рәсәй семинар-кәңәшмәһе үтте. Сарала Мәскәү, Санкт-Петербург, Иркутск һәм Кострома өлкәләре, Чечен һәм Адыгей республикалары, Байкал аръяғы һәм Краснодар крайы вәкилдәре ҡатнашты.

Тәүге көндә семинарҙың төп майҙансығы булған Конгресс-холда пленар һәм секция ултырыштары уҙҙы. Артабан форум үҙ эшен Өфөнөң 3-сө һәм 39-сы гимназияларында, 45-се һәм 159-сы урта дөйөм белем биреү мәктәптәрендә, Өфө дәүләт нефть техник университеты ҡарамағындағы 83-сө инженер лицейының төрлө йүнәлештә эшләгән майҙансыҡ­тарында дауам итте.
Йыйылыштарҙа мультимәҙәни контекста рус теле һәм әҙәбиәтен уҡытыу концепцияһын тормошҡа ашырыу, заманса мәктәптең мультимәҙәни белем биреү шарттарында икенсе сит телде өйрәнеү, белем усаҡтарында математика йүнәлешен­дәге ғилем үҫешен тормошҡа ашырыу һәм башҡа мөһим мәсьәләләр ҡаралды.
Ике көн дауамында барған ултырыштарҙан һуң, Мәғарифты үҫтереү институтында семинар-кәңәшмәгә йомғаҡ яһалды. Йыйылышта семинар программаһында төп аспекттар итеп күрһә­телгән рус телен, икенсе сит тел булараҡ немец телен, математика, физика фәндәрен, уҡыу программаһына инәсәк астрономия фәнен өйрәнеү буйынса мөһим тип билдәләнгән мәсьәләләрҙе хәл итеү юлдары барланды.