Ололар көнө шундай көн ул, үҙҙәре һымаҡ тыныс, һәүетемсә генә үтә. Беҙҙең илдә ул байрам көн һаналһа ла, кешеләр, бигерәк тә йәштәр битарафыраҡ. Ә шулай ҙа бөтмәгән икән ерҙә шәфҡәтле кешеләр.

Улар 2 октябрҙә бөтә Рәсәй буйлап гөрләтеп “Некислое такси” флеш­мобы үткәрҙе. Бында ил буйынса 40-тан ашыу ҡала, 400-ҙән ашыу экипаж һәм меңдән ашыу кеше ҡатнашты.
Әлбиттә, был акцияға өфө­ләр ҙә ҡушылмай ҡалманы. Һәр ваҡыт ил, донъя буйынса нимә барғанын белеп, төбәктә флешмобтар ойош­торған шәп егете­беҙ Инвир Хиса­мет­диновтан бының турала белеш­кәс, ул:
– Бөгөн беҙ, йәштәр, мәрхә­мәтле эштәр ҡылырға оноттоҡ – йә эшләй белмәйбеҙ, йә ялҡау килә. Ошо ниәттән башҡа­рыл­ған акция был. Ойоштороусылары – “Ютуб” селтә­ре­нең “Некислый канал” ағзалары һәм Рәсәйҙең байрам ойоштороусылар коллегияһы, – тине.
Ә флешмоб иһә тап ял көнө оло йәштәге инәй-бабайҙарҙы ҡала буйлап таксиҙа кәрәкле ерҙә­ренә бушлай алып барыуҙан ғибәрәт ине. Әлбиттә, тәү ҡа­рамаҡҡа акцияның исеме сәйерерәк һымаҡ тойолһа ла, был сараны яҡтыртҡан видео­таҫмаларҙа әсе лимон ашап, акцияны уйлап тапҡан мәрхә­мәтле йәштәргә ихласлап рәхмәт әйткән инәй-бабайҙарҙы күргәс, барыһы ла аңлашылды. Икенсенән, һыуыҡ­тар төшкән мәлдә сирләп кенә барған оло йәштәге кешеләргә лимон килешмәй ҡалмағандыр, ул әсе лә булып тойолмағандыр.