Республикабыҙҙа Рәсәйҙә ЮНЕСКО-ның тәүге геопаркын ойоштороу проектын башларға ниәтләйҙәр. Башҡортостан Хөкүмәтенең тейешле бойороғо хоҡуҡи мәғлүмәттәр сайтында донъя күрҙе.Документҡа ярашлы, геологик парк ойоштороу буйынса тәҡдимдәр әҙерләү өсөн эш төркөмө төҙөлдө. Уның етәксеһе — Хөкүмәт Премьер-министры урынбаҫары Дмитрий Шаронов. Эш төркөмөнә быйыл 1 декабргә тиклем республика биләмәһендә геопаркты ойоштороу йәһәтенән тәҡдимдәр булдырыу һәм уны Хөкүмәткә еткереү бурысы ҡуйылды.
Геопарк – махсус һаҡланыу статусына эйә булған төбәк. Уның биләмәһендә ерҙең геологик тарихы, урындағы ландшафттарҙың төҙөлөшө, шулай уҡ тау тоҡомдарының, файҙалы ҡаҙылмаларҙың барлыҡҡа килеү үҙенсәлектәре асыҡ сағыла.
Өҫтәмә биш мең һум
Киләһе йылдың ғинуарында хаҡлы ялдағылар пенсия менән бергә биш мең һумлыҡ компенсация аласаҡ. Аҡса түләүҙе һорап Пенсия фондына ғариза биреүҙең кәрәге юҡ.
Бер тапҡыр түләнә торған компенсацияға Рәсәйҙә даими йәшәгән һәм Пенсия фондынан пенсия алған кешеләр хоҡуҡлы. Быйыл фонд түләгән пенсияларҙың бөтә төрҙәре 4 процентҡа индексацияланды. Һөҙөмтәлә республикала страховка пенсияларының уртаса кимәле 12474 һум тәшкил итте.
Компенсация түләү тураһындағы ҡарар Рәсәй Хөкүмәте тарафынан ҡабул ителде. Әле федераль закон әҙерләнә. Ул көҙгө сессияла Рәсәй Федерацияһы Федераль Йыйылышына тәҡдим ителәсәк. 2017 йылдан индексациялауҙың әүәлге тәртибе ғәмәлдә ҡаласаҡ.
Ямғыр ҡойһа ла...
Баш ҡалабыҙҙа II Өфө халыҡ-ара марафоны тамамланды. Унда 2653 кеше ҡатнашты. Быйылғы ярыш өҫтәмә һынау ҡуйҙы — көн буйы ямғыр туҡтаманы.
Төп марафонда былтыр еңгән спорт мастеры Эдуард Төхбәтуллин быйыл финишҡа дүртенсе булып килде. Ул арауыҡты үҙенең чемпион графигынан дүрт минутҡа әкренерәк үтте. Тәүге өс урынды Урал ҡунаҡтары яуланы. Свердловскиҙан Алексей Никаноров менән Максим Никольников финиш һыҙығын бер-бер артлы уҙҙы. Силәбенән Семен Карягин — өсөнсө.
Паралимпия чемпионы Елена Паутова ир-егеттәрҙән бер ҙә ҡалышманы. 42 саҡрымлыҡ юлды ул һигеҙенсе, әммә ҡатын-ҡыҙҙар араһында беренсе булып үтте. Гүзәл зат араһында икенсе урынға Екатеринбургтан Ольга Пашагина, өсөнсөгә Өфөнән Динара Хисмәтуллина лайыҡ булды. 42 километрҙы йүгерергә теләк белдергәндәр араһынан финишҡа 216 кеше килеп етте.
Ярыммарафон дистанцияһында Өфөнән Таһир Хәйруллин еңеүгә өлгәште. Баш ҡалабыҙҙан Марат Йәләев – икенсе, Аҡъярҙан Айҙар Ишбулдин өсөнсө булды.