Бикеш ауылынан Хәнифә апай Ишалина оҙаҡ йылдар ауыл хужалығында зоотехник, ферма мөдире булып эшләй. Аҙаҡ, тормош иптәше Булат ағай һәм балалары менән кәңәшләшеп, үҙ эшен асырға йөрьәт итә.

Тәүҙә ул шәхси хужалыҡ ойоштора. Электән йылҡы аҫраған ғаилә ҡымыҙ етеште­реүҙе яйға һалырға уйлай. Йәмле Аласыҡ йылғаһы буйында 16 гектар ерҙе ҡуртымға алып, бәләкәй генә булһа ла йорт күтәреп, ялан кәртә булдырып, йылҡыны шунда тота башлайҙар.
– Ауылдаштарымдың “Хәни­фә­нең ҡулынан килгән эш, бирешмәҫ, алдына алған маҡ­сатын тормошҡа ашырыр әле”, тип хуплауҙарын ишетеп, дәрт­ләнеп эшкә тотондом, – ти Хәни­фә Азамат ҡыҙы. – Шөкөр, башланғысымды район хаки­миәте лә яҡлап сыҡты, ярҙам­дарынан өҙмәйҙәр, бер генә үтенесем дә яуапһыҙ ҡалмай.
Бөгөн Хәнифә апай – крәҫ­тиән (фермер) хужалығы етәк­сеһе. Әле көтөүҙә 30-ға яҡын йылҡы малы аҫрала, шуның 10-ы – һауын бейәһе.
Бынан тыш, һыйыр малы, ҡош-ҡорт тәрбиәләйҙәр. Ошонда уҡ баҡса ла үҫтерәләр. Ки­лә­сәктә Ишалиндар ер майҙа­нын арттырып, игенселек ме­нән дә шөғөлләнергә иҫәп тота.
Бейәләр көнөнә өс тапҡыр һауыла. Әҙер продукция заказ буйынса төрлө туй, юбилей кисәләренә оҙатыла икән. Артып ҡалған аҡты хужабикә баҙарға сығара. “Беҙҙең ҡы­мыҙҙы һәр ерҙә яратып һатып алалар, шуға ла ҡайһы саҡ етмәй ҙә ҡала”, – ти ул.