Салауат менән Стәрлетамаҡ ҡалалары араһындағы күлдәрҙең береһендә ғалимдар сөсө һыуҙа йәшәй торған медузаларға юлыҡҡан. Был турала билдәле орнитолог, Экологик экспертиза һәм биомәғлүмәт технологиялары институты директоры Виктор Валуев белдерҙе.

– Миңә Рәсәй Фәндәр академия­һының Өфө ғилми үҙәгендәге Биология институты директоры вазифаһын башҡарыусы биология фәндәре докторы Василий Мартыненко шылтыратып, республикалағы күлдәрҙең бере­һендә медузалар үрсеүе тураһында әйтте. Шунда уҡ Салауатҡа юлландым. Күлдә медузалар, диаметры 1-2 сан­тиметрлыҡ үтә күренеүсән йән эйәләре, ысынлап бик күп. Был табышты сенсация тип әйтергә була, – тине орнитолог.
Виктор Валуев әйтеүенсә, әле медузаларҙың төрөн асыҡларлыҡ белгестәрҙе эҙләйҙәр, Рәсәйҙәге ғилми-тикшеренеү институттарына хәбәр ителгән. Әммә илебеҙҙә сөсө һыуҙағы медузаларҙы өйрәнгән зоологтарҙың булмауы ла ихтимал.
Диңгеҙ тереклегенең күлгә нисек эләгеүе әлегә сер булып ҡала. Борон был урында океан булып, медуза­лар­ҙың шунан ҡалыуы ла бар. Өҫтәүенә әлеге күл шихандарға бик яҡын.