Баш ҡалабыҙҙың Салауат Юлаев майҙанында 3 сентябрҙә Рәсәйҙәге иң ҙур һөт байрамы – VI “Һөт иле” фестивале уҙғарыла. Республикалағы һөт һәм һөт ризыҡтарын етештереүселәр, шулай уҡ фермер хужалыҡтары унда үҙҙәренең продукцияһын тәҡдим итәсәк. Һөт фестивале күптән инде өфөләрҙең дә, ҡалаға килгән ҡунаҡтарҙың да яратҡан сараһына әүерелде. Ул сәләмәт тормошто пропагандалай. Һөт йәрминкәһе менән Фермер баҙары айырыуса ҙур танылыу алды. Бында ризыҡтарҙан ауыҙ итергә, оҡшағанын арзан хаҡҡа һатып алырға мөмкин.
Быйыл фестиваль уҙғарылған биләмәлә Һөтлө Арбат барлыҡҡа киләсәк. Ул йәйәүлеләр зонаһын тәшкил итә. Бында артистарҙың сығышын, оҫталарҙың ҡул эштәрен күрергә мөмкин. Бынан тыш, киберспорт майҙансығы ла ойошторола. Унда “Өфө” футбол клубы өсөн сығыш яһаған донъя чемпионы Роберт Фәхретдинов киләсәк. Ойоштороусылар әйтеүенсә, фестивалдең тамашалары бының менән генә сикләнмәй.