Кеше йәмғиәт барлыҡҡа килгәндән алып төҙөй һәм ижад итә. Төҙөүсе һөнәре донъяла иң әһәмиәтлеләрҙән һәм кәрәклеләрҙән һанала. Хеҙмәттәре ауыр һәм
яуаплы уларҙың. Үҙ ҡулдары менән мөһабәт биналар, күккә олғашҡан йорттар хасил иткән ябай эшселәр һәр саҡ ихтирамға һәм оло хөрмәткә лайыҡ.


Һөнәри байрамдары алдынан республика Башлығы Рөстәм Хәмитов тармаҡтың 25 иң яҡшы хеҙмәткәренә Башҡортостан Рес­публикаһының Почет грамо­та­һын тапшырҙы, 28 хеҙмәткәр “Баш­ҡортостандың атҡаҙанған төҙөүсеһе” тигән маҡтаулы исем­гә лайыҡ булды. Улар араһында ташсылар, монтажсылар, инже­нерҙар, архитекторҙар, иҡти­сад­сылар бар. Төбәк Баш­лығы, йыйылғандарҙы һөнәри байрамдары менән тәбрикләп, йәмәғәт өлкәһендә алып барған эшмәкәр­лектәре өсөн рәхмәт белдерҙе:
– Республикала төҙөлөш тармағы күрһәткестәре – лайыҡлы һәм юғары кимәлдә. Торлаҡты сафҡа индереү буйынса беҙ лидерҙар иҫәбендә торабыҙ. Шуны әйтергә кәрәк: торлаҡ төҙөү тармағы бик әүҙем эшләй. Төҙөүселәр тырышлығы менән эштәр тиҙ башҡарыла. Был тармаҡҡа индерелгән капи­тал­дың күпселек өлөшө мәға­риф, һаулыҡ һаҡлау, мәҙәниәт, спорт, торлаҡ объекттарын тө­ҙөү­гә йәки реконструкциялауға тотонола. Бөтә күңелегеҙҙе, көсөгөҙҙө һалып, эшегеҙҙе өлгөлө итеп башҡарыуығыҙ өсөн һеҙ был наградаға лайыҡ. Һеҙ һәр ваҡыт иғтибар үҙәгендә, эшегеҙ күҙ алдында. Минең бер үтенесем бар: балалар баҡса­һын, мәктәптәрҙе төҙөгәндә намыҫ менән башҡа­рығыҙ, сөнки ул – балаларыбыҙ донъяһы. Был эштә битараф­лыҡҡа юл ҡуймая­саҡбыҙ. Яҡшы эш алып барыу өсөн мөмкин­лектәр етерлек. Һөнәри байрамығыҙ уңайынан һәммәһен дә ихлас күңелдән ҡотлайым, ныҡлы һаулыҡ, эше­геҙҙә уңыш­тар теләйем.
Өфө ҡалаһының эре панелле йорттар һалыу идаралығы мон­тажсыһы Радик Хәлилов тар­маҡта 36 йыл эшләй: “Йәй көн­дәрендә бик ауыр, ҡояш ҡыҙҙы­ра. Һауа торошоноң ниндәй булыуына ҡарамаҫтан, эшләйбеҙ. Үҙемдең һөнәрем менән ғорур­ланам,”– ти ул.
“Акрополь” йәмғиәтенең коммерция директоры Радик Заһи­ҙуллин үҙҙәренең атҡарылған эштәре һәм киләсәккә пландары менән бүлеште. Тиҙҙән Күмертау ҡалаһында боҙ ҡаласығы төҙө­лөп бөтөүе тураһында һөйләне.
Ғафури районындағы “Энергомонтаж” йәмғиәтенең генераль директоры Хәлимулла Камалов та шатлығы менән уртаҡлашты:
– Төҙөлөш тармағында эшлә­үемә – 26 йыл. Эшеңдең һөҙөм­тәһен күреү, тейешле баһаһын алыу – иң ҙур бәхет.