Будапештағы Петер Пазмандең католиктар университетынан фән докторы Аттила Тюрк етәкселегендәге бер төркөм ғалимдар Өфө II ҡаласығында булды. Ҡунаҡтар археологик табыштар күргәҙмәһе менән танышты, ҡаҙыу эштәре барған урынды ҡараны.
Ғалимдар бил­дәлә­үенсә, бында табылған артефакттар ысын ғилми асышты тәшкил итә. Аттила Тюрк Башҡортостан коллегаларының хеҙмә­тенә юғары баһа бирҙе.
— Өфө II ҡаласығы ҙур тәьҫир ҡалдыра. Бындағы ҡатлам ҡеүәт­ле, археологик табыштар бай, файҙаланылған техника ла, эштәр ҙә һөҙөмтәле. Шуныһы ҡыуаныслы: Өфө ғалим­дары табыштар менән генә сиклән­мәй, монографиялар ҙа ижад итә. Эш артабан да дауам итер тип ышанам. Ул Көнсығыш Европа өсөн дә ҡыҙыҡлы объект булмаҡсы, — тине ул.
Әйткәндәй, “Боронғо Өфө” музей-ҡурсаулығы үткәргән өр-яңы ғилми тикшеренеүҙәр тәүге етди һөҙөмтәһен бирҙе. Ҡа­ласыҡ урынлашҡан ер ентекле өйрәнелде. Ул ҡатмарлы конструкцияны тәшкил итә. Табылған әйберҙәрҙең яҡынса датаһы билдәләнде. Улар араһында беҙҙең эраның VI—VII быуаттарында яһалған үҙенсә­лекле көмөш алҡа айырым урын биләй. Ғөмүмән, археология ҡомартҡыһы Рәсәй һәм сит ил ғалимдарын йылдан-йыл күберәк йәлеп итә.