Кисә Башҡортостанда Беренсе донъя һуғышында һәләк булған яугирҙәрҙе иҫкә алдылар. Рәсәй парламенты башланғысы менән билдәләнгән дата осраҡлы түгел: 1 август — Рәсәй Беренсе донъя һуғышына (1914—1918) ҡушылған көн.

Өфө һәм Ырымбур губерналарынан 480 меңдән ашыу кеше ул осорҙа армияға ебәрелә. Улар араһында дворяндар, крәҫ­тиәндәр ҙә була. Фронттарҙа Башҡортостан яугирҙәренән төҙөлгән хәрби частар, шул иҫәптән 106-сы Өфө һәм 190-сы Очаков пе­хота полктары һуғыша. Ҡаһарман яҡташтарыбыҙ ара­һында 166-сы Ровненск пехота полкы командиры, Генераль штаб генерал-майоры Рауил Сыртланов та бар. Бәләбәй өйәҙендә тыуып үҫкән яугир ҡаты һуғышта үҙ полкын һөжүмгә күтәреп, дошман нығытмаһына беренсе булып барып еткән өсөн 1917 йыл­дың февралендә (үлгәндән һуң) иң почетлы һәм юғары офицер наградаһы — IV дәрәжә Изге Георгий ордены менән бүләкләнә.
1 августа республика музейҙарында һәм художество галереяларында Беренсе донъя һуғышына арналған бик күп тематик күргәҙмәләр асылды, фәнни-ғәмәли конференциялар, олимпиадалар, иншалар конкурсы ойошторолдо.