Федор Шаляпин исемендәге I халыҡ-ара вокалсылар конкурсы жюрийына бөтә донъяға билдәле йырсы, Башҡортостандың халыҡ артисы Асҡар Абдразаҡов етәкселек итә.

Баһалама комиссияһы ағзалары иҫәбенә Рәсәйҙең күренекле мәҙәниәт һәм сәнғәт эшмәкәрҙәре инде. Улар араһында республикабыҙҙың танылған йырсылары һәм педагогтары — Башҡортостандың һәм Рәсәйҙең халыҡ артисы, Заһир Исмәғилев исемендәге Өфө дәүләт сәнғәт институты кафедраһы доценты, Башҡорт дәүләт опера һәм балет театры солисы Салауат Асҡаров, Рәсәйҙең һәм Башҡортостандың атҡаҙанған сәнғәт эшмәкәре, Өфө дәүләт сәнғәт институтының кафедра мөдире профессор Фәрзәнә Сәғитова һәм Башҡортостандың халыҡ артисы Эльвира Фәтихова ла бар.
Федор Шаляпин исемендәге халыҡ-ара вокалсылар конкурсы тәүге тапҡыр ХV “Өфөләге Шаляпин кисәләре” халыҡ-ара опера сәнғәте фестивале сиктәрендә уҙғарыла. Фестиваль 16 — 25 сентябрҙә була.