Башҡортостанда барлыҡ киң мәғлүмәт саралары ла ярайһы уҡ үҫешкән. Республика Матбуғат һәм киң мәғлүмәт саралары агентлығы етәксеһе Борис Мелкоедов Рәсәй төбәктәрендә медиаөлкәнең үҫеш индексы һөҙөмтәләренә аңлатма бирҙе.


“Медиастандарт” фонды илдең 85 тө­бәгендә киң мәғлү­мәт институты кимә­лен тикшерҙе. Баш­ҡортостан мөмкин булған дүрт кимәл­дең “ҡәнәғәтлә­нер­лек” тигән икенсе “В” категорияһына эләк­те. (“А” — “ыңғай”, “С” — “ҡәнәғәтлә­нер­лек түгел” һәм “D” — “киҫкен”).
Фонд, дөйөм рейтингка ингән биш шәхси индекстың һәр береһен ентекле һү­рәтләп, Баш­ҡорт­ос­тан паспортын тәҡ­дим итте. Шуныһы ҡыҙыҡлы: рес­публикалағы киң мәғлүмәт саралары контентын баһалаған күрһәт­кестәрҙең барыһы ла тиерлек уртасанан юғарыраҡ. “Төбәк һәм урындағы киң мәғлүмәт саралары тапшырған мәғлүмәттәр тулы, оператив һәм дөрөҫлөккә тап килә. Журналистар темаларҙы үҙаллы һайлай”, — тиелә рейтинг­ка бирелгән аңлатмала.
— Телесигналға, полиграфия ҡеүәттәренә килгәндә, беҙ — Рә­сәйҙә иң яҡшыларҙың бере­һе. Матбуғатты берәм­ләп таратыу йәһәтенән үҫеш ҡеүәте етерлек. Иң күп уҡыған республика бу­лыуыбыҙ ҙа мәғ­лүм. TNS мәғлү­мәттәре буйынса “БЮТ” иң яҡшы биш төбәк телеканалы иҫәбенә инә, ә “Башинформ” агентлығы Волга буйы федераль округында цитаталар алынған иң шәп сайттар ара­һында, — тине Борис Мелкоедов.