Дәүләт Йыйылышы — Ҡоролтай ҡарамағындағы Йәштәр йәмәғәт палатаһы ағзаһы Даян Солтанғужин “Клязьмалағы маҡсаттар биләмәһе” Бөтә Рәсәй форумында 200 мең һумлыҡ грант яуланы. “Милләт-ара мөнәсәбәттәр өлкәһендәге йәш белгестәр” сменаһында еңеүселәрҙе бүләкләү тантанаһы ошо көндәрҙә Владимир өлкәһендә үтте. Сарала тарихсылар һәм этнографтар, милләт-ара мөнәсәбәттәрҙе өйрәнгән йәштәр ҡатнашты. Йәмғеһе 19 республиканан һәм 15 илдән, шул иҫәптән Ҡытайҙан, Эквадорҙан, Мадагаскарҙан һәм Конгонан бер мең кеше килгәйне. Программаның маҡсаты этномәҙәни өлкәләге әүҙем йәштәргә тәрбиә биреү ине.
Милләт-ара мөнәсәбәттәр өлкәһендәге 25 проект 4,8 миллион һумлыҡ грантҡа тәҡдим ителде. Еңеүселәр араһында Даян Солтанғужин да бар ине. Ул 2017 йылда Башҡортостанда “Урал мираҫы” милләт-ара йәштәр этнофорумын үткәреүгә аҡса алды. Йәш парламентарийға шулай уҡ М.В. Ломоносов исемендәге Мәскәү дәүләт университетының Уҡыу-ғилми үҙәгендә белемен камиллаштырыуға сертификат тапшырылды.
— “Урал мираҫы” форумын икенсе йыл рәттән үткәрәбеҙ. Уның программаһында бизнес-тренингтар, семинарҙар, яҡташтар ойошмалары менән таныштырыу, башҡорт режиссерҙарының фильмдарын ҡарау, этноквест һәм спорт ярыштары ҡарала, — ти Даян Солтанғужин. — Башҡорт халҡының йолаларын өйрәнәбеҙ. Этник үҙенсәлектәрҙе юғалтыу — хәҙерге йәштәрҙең төп проблемаһылыр, моғайын. Әлеге грант ярҙамында йыйынды тағы ла киңәйтәсәкбеҙ. Киләһе йыл унда Урал биләмәһендә йәшәгән башҡа халыҡтарҙы ла саҡырырға ниәтләйбеҙ. Алда ҙур эш көтә, әлбиттә. Ләкин беҙ барыһына ла әҙербеҙ.