Йыл башынан Башҡортостанда 14 меңдән ашыу бала тыуған.Былтыр 59 меңдән ашыу сабый донъяға килгән, тип хәбәр иттеләр беҙгә Башҡортостан Һаулыҡ һаҡлау министрлығының матбуғат хеҙмәтенән.
Статистар республикала тыуым кимәле һәм мәғариф тармағының үҫеше тураһында мәғлүмәттәрҙе тикшергән. Бөгөн төбәктә 1333 мәктәпкәсә белем биреү учреждениеһы, 210 филиал хоҡуғына эйә булған ойошма һәм мәктәптәрҙә 453 мәктәпкәсә тәрбиә биреү төркөмө эшләй.
2016 йыл башына 233,8 мең сабый балалар баҡсаһына йөрөгән. Һуңғы йылда уларҙың һаны 10,2 меңгә артҡан. 2015/2016 уҡыу йылында иһә республикала 1369 дөйөм белем биреү мәктәбе һәм 709 филиал хоҡуғына эйә булған ойошма эшләй. Уларҙа 441,8 мең кеше уҡый.
Мәктәптәрҙә уҡытыу рус, башҡорт, татар, мари, сыуаш, удмурт телдәрендә алып барыла. Бынан тыш, мордва, немец, украин, белорус, латыш телдәре предмет булараҡ өйрәнелә. Йәкшәмбе мәктәптәрендә поляк, әрмән һәм йәһүд телдәренән дәрестәр инә.
Балалар ижады студиялары, спорт мәктәптәре һәм клубтары, художество мәктәптәре һәм башҡа учреждениелар эшләй. Спорт мәктәптәре һәм клубтарында 76,2 мең бала шөғөлләнә. Музыка, художество һәм сәнғәт мәктәптәренә 39,7 мең бала йөрөгән.
Башҡортостанда йәйге каникул ваҡытында уҡыусыларҙы һауыҡтырыуға һәм уларҙы реабилитациялауға ҙур иғтибар бүленә. “Башҡортостанстат” мәғлүмәттәре буйынса, йыл һайын өс меңгә яҡын һауыҡтырыу лагеры асыла, унда һәр икенсе мәктәп уҡыусыһы ял итә.