Былтыр эш эҙләп алты мең кеше республиканан ситкә киткән. Был 2014 йылдағы менән сағыштырғанда 1,5 тапҡырға күберәк. Нигеҙҙә, Мәскәү, Санкт-Петербург ҡалаларына, Татарстанға, Мәскәү һәм Силәбе өлкәләренә юлланалар. Эшсе көстө иң күп юғалтҡан төбәктәр – Хәйбулла, Ҡыйғы, Учалы, Ишембай, Дүртөйлө райондары, Салауат, Сибай һәм Бәләбәй ҡалалары.

* * *
Халыҡтың йән башына аҡсалата уртаса килеме, үткән йылғы йомғаҡтар буйынса, 2014 йыл менән сағыш­тырғанда 7,7 процентҡа артҡан һәм 28 мең һум тәшкил иткән. Был күрһәткес буйынса беҙ Рәсәй төбәктәре араһында – 27-се, Волга буйы федераль округында 4-се урындабыҙ.

* * *
Башҡортостанда эш шарттарына махсус баһа биреү әүҙемләшә бара. Уҙған йыл ошондай сараны үткәргән ойошмалар өс тапҡырға артты. Хәҙергә барлыҡ эшләүселәрҙең 57 процентының хеҙмәт шарттары тикшереү үткән.

* * *
Көрсөккә ҡаршы сараларға ярашлы, былтыр июлдә эшһеҙ ҡалған кешеләргә өҫтәмә ярҙам күрһәтеү тураһында ҡарар ҡабул ителгәйне. Ошо мәлдән алып эш эҙләгәндәргә һәм яңы һөнәр алырға теләүселәргә 15-әр мең һумға саҡлы матди ярҙам бирелде. Быйыл республиканың Хеҙмәт һәм халыҡты социаль яҡлау министрлығы Липецк өлкәһе миҫалында ауыл хужалығы кооперацияһын үҫтереүгә булышлыҡ итеү маҡсатында социаль контракт төҙөүҙе ғәмәлгә индерергә ниәтләй.