Ҡыҙғанысҡа ҡаршы, хатта яңы һәм зиннәтле автомобилдәр ҙә нисектер аңлашылмаған өн сығарып эшләй. Ә инде ябайҙары тураһында әйтәһе лә түгел. Ни өсөн?Шуны дөрөҫ аңлау зарур: өр-яңы автомобиль алыу “тимер ат”ыңдың сәғәт кеүек эшләүен аңлатмай әле. Шуға күрә лә водителгә өҫтәмә мәшәҡәттәрҙе үҙ өҫтөнә алырға тура килә. Ҡайһы шофер тыштан килгән тауыштың мөмкин тиклем әҙ ишетелеүен теләмәй икән?! Бындай эште кемдер үҙе башҡара, автосервиста ла һеҙгә ярҙамға киләсәктәр. Тауышты кәметеү өлөшләтә һәм тулайым була.
Тулайым тигәне байтаҡ ваҡытты ала, уны оҫталар ғына башҡара. Ә бына урыны-урыны менән тишектәрҙе ҡаплауға һәүәҫкәрҙәр ҙә ҡурҡмайынса тотона ала. Ишектәрҙе “ямау” иң киң таралғаны һанала. Уларҙың да төрлөһө була, завод нисек эшләп сығара бит әле. Ә ҡайһыһында ярыҡ булыуын еңел билдәләргә мөмкин. Берәй оҙайлы сәфәрҙән һуң ишектәрҙе асып ҡараһағыҙ, йәй икән, ҡайҙа саң йыйылыуын, ә ҡыш ҡар барлығын күрерһегеҙ.
Хәҙер төҙөлөш магазиндарында нимә генә һатылмай. Әйтәйек, резина таҫма һәм елем һатып алаһың да эште башлайһың. Бынан тыш кузовты ла йымлайҙар, хатта – тәгәрмәстең өҫтөн дә.