Рәсәй Хөкүмәте Рәйесе Дмитрий Медведев 2016 йылда балаларҙың ялын һәм уларҙы һауыҡтырыуҙы ойоштороу мәсьәләләре буйынса видеоселектор кәңәшмәһе үткәрҙе. Унда Башҡортостан Республикаһы Башлығы Рөстәм Хәмитов та ҡатнашты.

Премьер-министр бил­дәләүенсә, һуңғы йылдарҙа федераль һәм төбәк влас­тары балалар лагерҙары торошон яҡшыртыу йәһәте­нән байтаҡ эш башҡарҙы.
— Быйыл төбәктәрҙең күпселеге йәйге кампанияға былтырғынан кәм булмаған күләмдә аҡса бүлде. Төбәк ҡаҙналарындағы ярайһы уҡ ҙур ҡатмарлыҡтарҙы, иҡти­садтағы проблема­ларҙы иғтибарға алғанда, был бик мөһим, — тине Дмитрий Медведев.
Рәсәй Хөкүмәте Рәйесе ауыр хәлгә тарыған балалар, инвалидтар һәм етем­дәр өсөн ялды берлектә финанслауға дүрт миллиард һумдан ашыу аҡса бүленәсәге хаҡында бел­дерҙе. Ошо аҡсаға быйыл өҫтәмә рәүештә тағы ла 200 меңгә яҡын бала ял итәсәк.
— Әүҙем әҙерлек эшенә ҡарамаҫтан, йыл һайын ниндәйҙер ҡыйынлыҡтар тыуып тора. Кадрҙар һай­лау­ға ла, туҡланыуға ла дәғүә бар. Әммә иң мөһиме хәүефһеҙлектер, моғайын, — тине Дмитрий Медведев.
Ошоға бәйле Премьер-министр автобустарҙа, поездарҙа балаларҙы ташыу, туҡланыуҙы тейешле кимәлдә тәьмин итеү талаптарын боҙған өсөн яуаплылыҡты көсәйтеү зарурлығын билдәләне.