Районда Рәсәйҙәге граждандар оборонаһы һәм ғәҙәттән тыш хәлдәрҙе иҫкәртеү, бөтөрөү буйынса берҙәм дәүләт системаһының республика кимәлендәге команда-штаб күнекмәләре үтте. Сарала “Башҡортостан” милли паркы, Стәрлетамаҡ урман хужалығы һәм башҡа ойошмалар ҡатнашты.

Сараның маҡсаты — урман яныуы тер­кәлгән осраҡта уның эҙемтәләрен бө­тө­рөүгә идара итеү тәжрибәһен үҫ­тереү, халыҡты хәүеф сығанаҡтарынан һаҡлау кимәлен яҡшыртыу, ғәҙәттән тыш хәлдәрҙе иҫкәртеү һәм граждандар оборонаһы эштәрен дөрөҫ ойошторорға өйрәнеү, етешһеҙлектәрҙе асыҡлау.
Алдан билдәләнгән планға ярашлы, иртәнсәк райондың Озерки ауылы эргә­һендә оператив штаб урынлаштырылды. Күнекмәгә етәкселек иткән Баш­ҡортостан урман хужалығы министры Динир Әхмәтйәнов һәм Ғәҙәттән тыш хәлдәр министрлығының Баш­ҡорт­остандағы баш идаралығы начальнигы Марат Латипов менән Янғындарҙы һүндереү һәм алдан иҫкәртеү үҙәге етәк­сеһе Рудик Ғилманшин, район хакимиәте башлығы Рөстәм Шәм­сет­динов, Күгәрсен, Ғафури, Бәләбәй, Әлшәй, Архангел, Ишембай урмансы­лыҡ­тары вә­килдәре, Воскресенск урман участ­каһы арендаторы, “Башҡортостан” милли паркы, “Мораҙым тарлауығы” тәбиғәт паркы, Шевченко, Денис ауыл советта­ры хакимиәттәре, полиция һәм медици­на хеҙмәткәрҙәре әҙерлек кимәлен тик­шерҙе, техника паркы менән танышты.
Артабан хәүефһеҙлек инструктажы үткәрелгәндән һуң янғын һүндереү буйынса тактик күнекмәләр башланды. Сцена­рийға ярашлы, Стәрлетамаҡ урмансылығы биләмәһендә ут сығыуы теркәлә, Мәләүез районы буйынса берҙәм дежур-диспетчер хеҙмәтенә хәбәр ителә. Хәлде асыҡлау маҡса­тында комиссия рәйесе тарафынан янғын урынына оператив төркөм ебәрелә. Район хакимиәте башлығы бойороғо нигеҙендә урындағы граждандар оборонаһы көстәре өсөн юғары әҙерлек режимы иғлан ителә. Стәр­летамаҡ урмансылығының янғын һүнде­реүселәре, артабан милли парктың, унан һуң Воскресенск урман участ­каһының мобиль төркөмдәре янғын урынына юллана. Ут менән көрәшергә көстәрҙең етмәүе арҡаһында Ғәҙәттән тыш хәлдәрҙе иҫкәртеү, бөтөрөү буйынса Мәләүез районының территориаль звеноһы ярҙамға ҡушыла. Ул урында пилотһыҙ осоусы аппараттан янғындың тулыһынса һүндерелеүе тураһында хәбәр итә.
Туғыҙ гектар майҙанда уҙғарылған күнекмәгә заманса техника, вертолет, пилотһыҙ осоусы аппарат, 30 берәмек техника йәлеп ителде. Көнө буйы дауам иткән күнекмәләргә йомғаҡ яһап, Башҡортостандың урман хужалығы министры Динир Әхмәтйәнов күнекмә барышында асыҡланған етешһеҙлектәрҙе бөтөрөүгә, уларҙы анализлауға иғти­барҙы арттырырға тәҡдим итте. Район хакимиәте башлығы Рөстәм Шәмсет­диновҡа һәм граждандар оборонаһы, ғәҙәттән тәш хәлдәр һәм мобилизация эштәре буйынса бүлек начальнигы Олег Воробьевҡа сараны юғары кимәлдә ойоштороуҙа булышлыҡ иткәндәре өсөн рәхмәт белдерелде.