Күптән түгел генә илебеҙҙә Чернобыль һәләкәте ҡорбандарын иҫкә алыу көнө булды. Ул осорҙа бындай фажиғәләр буйынса эш итеү тәжрибәһе булмаған күпме кеше үҙен аямайынса башҡаларҙың ғүмерен ҡотҡарырға тырышҡан. Тәү сиратта эшкә, әлбиттә, хәрбиҙәр, Оборона министрлығының оператив төркөмдәре, хоҡуҡ һаҡлау структуралары вәкилдәре йәлеп ителгән. Фажиғә эҙемтәләрен бөтөрөүҙә ҡатнашҡандарҙың күбеһе арабыҙҙа күптән юҡ инде. Әммә ҡаһармандарҙың иҫтәлеге халыҡ хәтеренән юйылмай.
Ошо көндәрҙә Рәсәй Эске эштәр министрлығының Өфө юридик институтында Өфөнөң Киров районындағы “Чернобыль” союзы” йәмәғәт ойошмаһы рәйесе, отстав­ка­лағы полковник Суран Дәүләтбаев һәм инвалид­тарҙың “Союз-Чернобыль” төбәк-ара йәмәғәт ойошмаһы рәйесе, отставкалағы подполковник Николай Киселев менән осрашыу булды. Сара башланғас та йыйылған ха­лыҡ, бер минутҡа тын ҡалып, һәләк булғандарҙы иҫкә алды.
– Авария эҙемтәләрен бөтөрөүҙә Өфөнән генә биш меңдән ашыу кеше ҡат­наш­ҡан. Әле уларҙың меңгә яҡы­ны ғына иҫән. Ҡыҙғанысҡа ҡар­шы, йылдан-йыл кәмей баралар, – тине Суран Зәй­нулла улы, тәьҫораттары ме­нән уртаҡлашып. – Ул осор­ҙа барыбыҙ ҙа ҡушылғанды эшләнек, эҙемтәләр хаҡында уйланманыҡ.
– Мин вертолетсы инем, – тип һөйләшеүгә ҡушылды Николай Семенович. – Зыянлы нур таралған төбәктә дезактивация менән шөғөл­ләндем. Яҡшы әҙерлек ме­нән килеүебеҙгә, граждандар оборонаһы сараларын, хәр­би тактиканы өйрәнеүе­беҙгә ҡарамаҫтан, бында күргән­дәребеҙҙән ҡотобоҙ осто, юға­лып ҡалдыҡ. Шулай ҙа ҡуйылған бурысты намыҫ менән үтәнек, кешеләрҙе эвакуацияланыҡ.
Ветерандар был көндә хәтирәләрен уртаҡлашып ҡына ҡалманы, иҫтәлеккә китаптар ҙа бүләк итте. Өфө юридик институты курсанттары иһә ветерандарға ла, уҡыу йорто начальнигы, полиция генерал-майоры Фәим Мөхәмәтшинға ла фәһемле осрашыу өсөн оло рәхмәтен белдерҙе.