Гитлер илбаҫарҙарына ҡаршы һуғышҡа был райондан 10 меңгә яҡын кеше алынған, шуларҙың яртыһынан да аҙырағы тыуған яғына иҫән әйләнеп ҡайтҡан. Араларынан алты мең самаһы яугирҙең ҡаһарманлығы төрлө орден-миҙалдар менән баһаланған.

Илештә бөгөн Бөйөк Ватан һуғышында ут-һыу кискән 41 кеше йәшәй. Уларҙың иң олоһона – Иҫке Ҡырғыҙ ауылынан Ғәлимйән Шәриповҡа – 100 йәш.
– Ветерандарға һәр яҡлап ярҙам күрһәтелә, урындағы хакимиәт береһен дә иғтибарынан өҙмәй, – ти райондың ветерандар советы рәйесе Анатолий Романов. – Ҡулына ҡорал алып, илебеҙгә тыныс тормош яулағандарҙың һәммәһе лә уңайлы фатир менән тәьмин ителгән.
Һүрәттә 93 йәшлек Мәғрүф Ҡәриповты, 91 йәшлек Хәнәфи Шәһәбетдиновты һәм 93 йәшлек Фәһим Ғафаровты күрәһегеҙ. Орден-миҙалдарын тағып, егеттәрсә дәртле баҫып, төрлө осрашыуҙарға ихлас йөрөй улар.
– Һуғыш михнәттәрен ҡабаттан татырға яҙмаһын, илебеҙ күге һәр саҡ аяҙ булһын. Яңы быуын тыныслыҡтың нисек яуланғанын онотмаһын, – ти яугирҙәр.