Федераль ҡаҙнанан Башҡортостанға дөйөм белем биреү ойошмаларында яңы урындар булдырыуға 535 862,3 мең һумдан ашыу субсидия бүленде. Рәсәй Хөкүмәтенең сайтында ошо туралағы бойороҡ донъя күрҙе.

25 миллиард һумлыҡ субсидия, 2013 – 2020 йылдарға иҫәпләнгән “Мәғарифты үҫтереү” дәүләт программаһына ярашлы, илдең 56 төбәк бюджеты араһында бүленде. Әйткәндәй, ул Рәсәйҙең Мәғариф һәм фән министрлығы билдәләгән тәртиптә һайлап алынған төбәктәргә бирелде. Төп нигеҙ – демографик хәлде иҫәпкә алып, бер сменала уҡыу урындары менән тәьмин итеүгә ихтыяж, өсөнсө сменаны тулыһынса бөтөрөү зарур­лығы, шулай уҡ мәктәп йәшендәге балалар һанының йылдам артыуы.
Теге йәки был төбәктең ҡаҙнаһында тейешле сығым йөкләмәһен, 2016 – 2025 йылдарға төбәк программаһын үтәүгә ассигнованиеларҙың булыуы һәм мәктәпте төҙөгәндә типовой проект документтарын мотлаҡ файҙаланыу аҡса бүлеү өсөн төп шарттар иҫәбенә инде.