Өфөнөң Мостай Кәрим исемендәге 158-се башҡорт гимназияһында традицион йәйәнән уҡ атыу буйынса семинар, июлдә Ғафури районында ойоштороласаҡ “Мәргән уҡсы” фестиваленең беренсе туры үтте.

– Был спорт төрөн киң йәйелдереү маҡсатын күҙ уңында тотҡан ҙур сара республикабыҙҙа беренсе тапҡыр уҙғарыла, – тине “Любизар” хәрби-тарихи клубы етәксеһе урынбаҫары Юлай Ғәлиуллин. – Фестивалдең йәш быуын күңелендә миллә­тенә, тыуған еренә, тарихына ҡарата һөйөү, ғорурлыҡ тойғоһо тәрбиәләү, милли спорт төрөн тергеҙеү йәһәтенән өлөшө баһалап бөткөһөҙ.
Семинарҙың тәүге яртыһында хәрби-тарихи клуб ағзалары, реконструкторҙар уҡ-һаҙаҡтың төрҙәре хаҡында һөйләне, уларға бәйле легенда-хикәйәттәрҙе бәйән итте. Артабан ҡорамалдарҙы дөрөҫ ҡулланыу, хәүефһеҙлек ҡағиҙәләре менән таныштырҙы­лар. Сараның ғәмәли өлөшөндә иһә теләгән һәр кем мәктәптең спорт залында мәргәнлеген һынап ҡараны.
Ҡатнашыусылар араһында төрлө һөнәр эйәләре, алыҫ райондарҙан, Орск ҡалаһынан килгәндәр булды. Сарала “Любизар” хәрби-тарихи клубы етәксеһе Илдар Шәйәхмәтов халыҡты тарихын, ғөрөф-ғәҙәттәрен, рухи ҡиммәттәрен өйрәнеүҙә әүҙемерәк булырға саҡырҙы.