Бөгөн – Рәсәй анимацияһы көнө. Ғәҙәттә, ил буйынса был көндә бик күп саралар, фести­валдәр уҙа. Быйыл беҙҙә лә был дата ысын байрам төҫөн алмаҡсы. Ошо хаҡта Башҡорт­остан Кинематографистар союзы рәйесе Фәрит Фәтих улы ҒӘБИТОВ менән әңгәмә­ләшәбеҙ.

– Быйыл Рәсәй киноһы йылы булғас, анимация көнө лә бик ҡы­ҙыҡлы булмаҡсы, тип ишет­кәйнек...
– Эйе, балалар һәм айырыуса балалар анимация студиялары өсөн бик матур байрам үткәрәбеҙ. Бөгөн “Родина” кинотеатрында “Йәнһүрәт” республика балалар анимацияһы фестивале асыла. Уны “Башҡортостан” киносту­дияһы менән берлектә үткәрәбеҙ. “Йәнһүрәт” фестивале сиктәрендә байтаҡ саралар – оҫталыҡ дәрес­тәре, конкурстар ойошторабыҙ, иң шәп эштәрҙе билдәләп, уларҙы республика буйынса күрһәтмәксебеҙ.
– Был – бик күләмле, яуаплы һәм яңы эш. Һис шикһеҙ, ул балалар анимацияһын яңы кимәлгә күтәрәсәк. Әммә һәр ҙур эшкә финанс йәһәтенән нигеҙ кәрәк. Һеҙҙең ижади союз ҡайҙан ярҙам ала?
– Быйыл Башҡортостан Кинематографистар союзы бик ҙур пландар менән яна. Уларҙы финанслау сығанаҡтары ла төрлөсә. Ә инде был фестивалде уҙғарыр өсөн Хеҙмәт һәм социаль яҡлау министрлығының субсидияһын алыуға өлгәштек. Хәҙер инде ярҙамсыларым, фестивалдең кураторҙары – кинорежиссер Таңсулпан Бураҡаева, анимация режиссеры Айгөл Байрамғолова, союздың яуаплы секретары Зөһрә Бураҡаева менән ең һыҙғанып эшкә тотондоҡ.
– Эйе, башҡорт киноһы өлкәһендәге саралар, ысынлап та, бик күңелле һәм йөкмәткеле үтә, гел ниндәйҙер яңылығы менән аптырата. Бөгөн нимә­ләр менән һөйөндөрмәк­сеһегеҙ?
– Фойела ҡунаҡтарыбыҙ өсөн бик ҡыҙыҡлы программа әҙер­ләнек: “Латифа” студияһының йәш рәссамдар күргәҙмәһе, киновикторина, Ғафури районының йәш артистары сығышы. Бөгөн кинотеатрҙың зәңгәр залында Башҡортостандың анимация режиссерҙарының фильмдары күрһәтелә. Сара Өфө ҡыҙы Анна Мальгинованың “Йөрәк. Бубен. Самолет” исемле яңы филь­мының исем туйынан башлана. Ә билдәле режиссерҙар Рим Шәрәфетдинов, Айгөл Байрам­ғолова, Елена Юшкова, Владислав Байрамғолов һәм дә “Ай” балалар анимация студияһы башҡортса йәнһүрәт төшөрҙө.