Ишетмәнеләр... Әллә ишетмәмешкә һалыштылар. Үҙҙәренсә ғорур булып ҡыландылар инде... Ә бит Путиндың Берләшкән Милләттәр Ойошмаһындағы сығышынан һуң күптәр хәл-ваҡиғаларҙың ошондайыраҡ ағышын фаразлағайны. Шул саҡта уҡ бер төптән егелеп, террор тигән яуыз көскә ҡарата эҙмә-эҙлекле көрәш башлағанда, бәлки, бөгөнгө хәлгә лә килеп етмәҫ инек. Әммә АҠШ битараф ҡалды. Европа союзы ла теләктәшлек күрһәтмәне. Кемде-кемде, Рәсәйҙе һанламайҙар, йәнәһе. Һөҙөмтәме? Париж... Ливия... Мысыр... Төркиә... Һәм, бөгөн килеп, Брюссель... Исемлектең иртәгә ниндәй ил, ҡала менән тулыланырын күҙаллауы ла ҡурҡыныс.Иң аяныслыһы: йәмғиәт үҙе үк бындай террор акттарына күнегеп бара кеүек. Тегендә шартлатҡандар, бында яндырғандар... Шунса-шунса ҡорбан... Һәм барыһы ла артабан үҙ яйына дауам итә. Ҡурҡыу, хәсрәт тойғоһо ла юҡ. Әйтерһең дә, шулай булырға тейеш.
Террорсылыҡ тормошобоҙға шул тиклем ныҡ үтеп инде. Ниндәйҙер кимәлдә ул хатта ғәҙәти ысынбарлыҡҡа әүерелә барған кеүек. “Етәкселәрҙе һиҫкәндерер, битарафлыҡтан сығарыр өсөн, психологик термин менән әйткәндә, шаңҡытыу терапияһы кәрәк. Ҡорбандар аҙ... Әгәр террор акттарында миллиондарса кеше һәләк була башлаһа, бәлки, берләшерҙәр ине”, – тигәйне бер депутат үҙенең сығышында. Ҡот осҡос! Тимәк, әлегә террорсылыҡ үҙ маҡсатына өлгәшеп етмәгән... Миллионлаған ҡасаҡ, меңләгән ҡорбан, ҡан ҡойош, күҙ йәштәре... Барыһы ла “репетиция” ғына булып сыға... 
Хәйер, берләшер өсөн, миллионлаған ҡорбандан да бигерәк, бәлки, үҙаллылыҡ кәрәктер. Шул уҡ АҠШ менән Европа Союзын ғына алып ҡарайыҡ. Улар бит бөгөн эске сәйәсәттә генә түгел, хатта ул уҡ хәүефһеҙлек мәсьәләһендә лә бер-береһенә буйһона. Системалы эш юҡ. Йәки Брюссель. Ошоғаса террорсылыҡ, хәүефһеҙлек хаҡында күпме генә һөйләһәләр ҙә, Бельгия бындай хәл-ваҡиғаларға бөтөнләй әҙер булмай сыҡты. Илдә мәхшәр. Берлек юҡ. Брюсселдең үҙендә генә бер-береһенә бөтөнләй буйһонмаған алты полиция участкаһының эшләүен нисек аңларға? Ирекһеҙҙән Крыловтың Аҡҡош, Ҡыҫала һәм Суртан хаҡындағы мәҫәле иҫкә төшә. Хәйер, бөгөн бар донъя йәмәғәтселеге шундай хәлдә кеүек: берәүҙәр тыныслыҡ яҡлы, икенселәр үҙ кеҫәһен ҡайғырта, өсөнсөләр бөтөнләй ни теләгәнен дә аңламай. Уның ҡарауы, террорсылыҡ “сәскә ата”. Бәлки, кемдеңдер кеҫәһен тикшерәһе, санкциялар менән ҡурҡытаһы, Рәсәйгә ҡаршы виртуаль һуғыш алып бараһы урынға ысынбарлыҡтағы яуызлыҡҡа ҡаршы көрәшергә кәрәктер?Уҙған быуаттың икенсе яртыһында илебеҙ халҡы коммунизм хаҡында хыялланып бер булды, уны ҡасан күрербеҙ инде, тип баш ватты. 90-сы йылдар болғанышы етеп, СССР тарҡалғас, артҡа боролоп ҡараһаҡ, бәй, коммунизмдың үҙендә йәшәгәнбеҙ икән! Иртәгәң тыумайынса бөгөнгөңдөң ни ҡәҙәр яҡшы булғанын белмәҫһең, тиҙәр бит.