Тиҙҙән супермаркеттарҙа аҙыҡ-түлек һәм көнкүреш кәрәк-ярағы менән бер рәттән дарыуҙар ҙа һатып алып буласаҡ. Рәсәйҙең Һаулыҡ һаҡлау министрлығы вәкиле Олег Салагай тәҡдим итеүенсә, рецептһыҙ оҙатылған дарыуҙарҙы, бинт, мамыҡ кеүек медикаменттарҙы магазин кәштәләренә сығарыу бер ҙә насар түгел.

Әлеге мәсьәлә белгестәрҙе бер бөгөн генә борсомай. Дарыуҙарҙы магазин кәштәләренә сығарыу мөмкинлеге 2012 йылдан бирле өйрәнелә. Һаулыҡ һаҡлау министрлығы тәҡдим итеүенсә, исемлеккә тамаҡ ауыртҡандан антисептиктар, тымауға ҡаршы тамсылар, шифалы майҙар, һалҡын тейеүгә ҡаршы препараттар индерелергә тейеш. Проект буйынса фекер алышыу март аҙағынаса дауам итә.