Мәһәҙей ауылында ветерандар берләшмәһе, ағинәйҙәр ҡоро ағзаларының тырышлығы менән урамдар ярышы үтте. Көндөң һыуыҡ булыуына ҡарамаҫтан, байрамда халыҡ дәррәү ҡатнашты.

Баһалама ағзаларын һәр урамда милли ризыҡтан һығылып торған өҫтәл, төрлө күргәҙмәләр менән ҡаршы алдылар. Түбәнге ос халҡы ҡаҙы, тултырма, буҙа тәҡдим итһә, үрҙекеләр бишбармаҡ, бауырһаҡ, бәлештәр бешергән. Ҡамышаҡтар иһә ҡарҙан төрлө һын яһағайны.
Был көндә балалар әкиәт донъяһын хәтерләт­кән һырғалаҡтарҙа рәхәтләнеп шыуҙы. Ә өл­кәндәр, ауылдаштары Баязит Сәйәховтың гармунына бейеп, һыуыҡтың үҙен ҡурҡытты кеүек. Арҡан тартышыу, йүгереү, саңғы ярыштарында йәштәр менән бергә ветерандар ҙа ихлас ҡатнашып, өлгө күрһәтте. Сәләмәт тәндә – сәләмәт рух!