Йомарт ерҙең ҡуйынына барыһы ла һыйған: ҡуйы урмандар ҙа, сылбыр булып теҙелеп киткән тауҙар ҙа, икһеҙ-сикһеҙ яландар ҙа... Кешеләрҙең күңеленә лә күскән был киңлек. Тыуған төйәген мөкиббән яратҡан халыҡ мул тормошта күп бала үҫтереп, ихлас донъя көтә.

Мәҫәлән, Яңы Күл ауылынан Регина менән Рәмил Фәрхетди­новтарҙа биш ҡыҙ буй еткерә. Өлкәненә туғыҙ йәш тулһа, бәләкәсенә алты ай ғына әле. Яҙҙың тәүге байрамы 8 Мартты ғаилә башлығы быйыл, үҙе әйт­мешләй, алтылата шатлыҡ менән ҡаршы алған.
– Тыуған нигеҙҙә күп бала үҫтереп йәшәү – үҙе ҙур бәхет, – ти ул. – Әйткәндәй, ошонда уҡ төйәкләнгән Йәмил ағайым­дың ғаиләһендә алты малай буй еткерә! Атай-әсәйемдең рухы шаттыр. “Ғаилә ишле булырға тейеш”, – ти торғайны улар. Үҙҙәре беҙҙе, ете бала­һын, хеҙмәт һөйөргә, әҙерҙе көтөп ултырмаҫҡа, ауырлыҡ­тарҙан ҡурҡмаҫҡа өйрәтеп үҫтерҙе.
Ошондай мөхиттә буй еткергән Рәмилде эшһеҙлек гелән урап үткәндәй: йүнселгә һәр саҡ йүне сығып тора. Элегерәк ҡырға йөрөп аҡса табырға тура килһә, хәҙер инде үҙҙәрендә асылған “Йәшел ожмах” йәмғиәтендә тракторсы хеҙмәтен лайыҡлы атҡара. Ойошмала йәшел­сә­селек менән шөғөлләнәләр. Үҙе­беҙҙең продукцияны етештереүгә өлөш индерә алыуы менән ғорур механизатор Рәмил Фәрхетдинов.
Ҡатыны Регина иһә – Өфө ҡыҙы.
– Ауылда йәшәрмен, күп бала үҫтерермен тип ғүмерҙә лә уйла­мағайным, – ти ул, йылмайып. – Ә был шул ҡәҙәр ҙур бәхет икән! Һиллек, киңлек, саф һауа... Эргәңдә – яратҡан ирең, “әсәй” тип өҙөлөп торған балаларың, көн-төн тип тормай, ярҙам итергә әҙер туғандарың, көн дә хәлеңде һорашыр күрше­ләрең. Ошондай тормошҡа ни етә?!
Регина Таһир ҡыҙы ауылда үткән бер саранан да ситтә ҡалмай. Әүҙем килен бәйләргә, тегергә, сигергә оҫталығы менән тотош районда танылыу яуларға өлгөргән. Һоҡланғыс ҡул эштәре йортона йылылыҡ, нур өҫтә­гәндәй.
– Районда ойошторолған башҡа конкурстарҙа, төбәк гәзите үткәргән викториналарҙа даими ҡатнашам, – ти уңған хужабикә. – Ғөмүмән, ваҡытты бушҡа уҙғарырға яратмайым. “Балалар күмәк, өлгөрөп булмай” тигән һүҙҙәрҙе һылтау тип ҡабул итәм. Ишле ғаиләлә бар эш тә ишелеп уңа ул. Балабыҙ берәү булған саҡта миңә, киреһенсә, ауыр ине – күп нәмәгә өлгөрә алмай торғай­ным. Хәҙер иһә бөтөн эште бергәләп башҡарабыҙ. Ҡыҙҙа­рыбыҙ бер-береһен ҡарай, тәрбиәләй, сәстәрен үрешә, бәләкәс һеңлеләренең йүргәген алмаштыра, йырлап йоҡлата... Ғөмүмән, хеҙмәткә өйрәнеп үҫәләр. Бер-ике генә балалы ғаиләлә бындай мөмкинлек бармы икән?
Кинйә ҡыҙына өс йәш тулғас, Регина Таһир ҡыҙы үҙ эшен булдырырға ниәтләй. Ни тиһәң дә, юғары белеме бар – заманында Өфө дәүләт иҡтисад һәм сервис академияһын тамам­лаған.
– Хәҙерге йәмғиәттә “тәүҙә – карьера, унан – ғаилә” тигән ҡағиҙә йәшәй, – ти ул. – Минеңсә, был дөрөҫ түгел. Ҡатын-ҡыҙ үҙенә тәғәйенләнгән төп бурысты – бала табыуҙы – тәү сиратта тормошҡа ашы­рырға тейеш. Юғиһә аҙаҡ һуң булыуы ла ихтимал. Үҙемә килгәндә, хәҙер инде ныҡлы көс менән эшкә тотонорға, карьера хаҡында уйларға мөмкин. Иремдең, ҡыҙҙарымдың бөтөн яҡлап терәк булырына иманым камил.
“Районыбыҙҙа күмәк балалы ғаиләләргә иғтибар ҙур”, – ти Фәрхет­диновтар. Улар үҙҙәренә тейешле ташламаларҙы даими файҙалана, дәүләт программа­һына ярашлы заманса яңы йорт та ҡалҡытҡандар.
– Күпләп мал, ҡош-ҡорт үрсетә башларға, баҡсаны тағы ла киңәйтергә ниәтләйбеҙ, – ти Рәмил. – Оло юл буйында ятҡан ауылыбыҙҙа йәшәү өсөн бар­лыҡ уңайлыҡтар бар. Урта мәктәптә 200-ҙән ашыу уҡыусы белем ала, балалар баҡсаһы ла йылдан-йыл тулылана. Тимәк, ирмен тигән ир-аттың бурысы – барҙы һаҡлау, үҫтереү маҡсатындағы тынғыһыҙ хеҙ­мәт­тән туҡталмау.