Ял көндәрендә Төмәндә биатлон буйынса Европа чемпионатының сираттағы уҙышы булды. 12,5 саҡрымға ир-егеттәр пасьютында Өфөнән Антон Бабиков еңеп сыҡты.

Яҡташыбыҙ финишта Рәсәй спортсыһы Евгений Гараничевтан бер нисә секундҡа ғына алда килде. Өсөнсө урынды немец Флориан Граф яуланы.
Гараничев менән Бабиков пасьютты әүҙем башлағайны. Ике атышты уңышлы үтеп, улар башҡаларҙы артта ҡалдырҙы һәм өсөнсө араны икәүләп үтте. Өсөнсө килгән Ветле-Сьястад Кристиансен Рәсәй спортсыларынан бер минутҡа ҡалыша ине.
Дүртенсе арала иһә Гараничев та, Баби­ков та штраф алып, бер аҙ һүлпәнәйҙе. Лә­кин был уларҙың еңеүенә ҡамасауламаны.
Әйткәндәй, Антон Бабиков был чемпионат барышында ике бронза миҙал да яулағайны. Ул хәҙер биатлон буйынса Рәсәйҙең ир-егеттәр йыйылма командаһы менән донъя чемпионатында сығыш яһаясаҡ. Беренселек 3 – 13 мартта Холменколленда (Норвегия) үткәрелә.