“Минең Ватаным был –
Тәрән тамырым.
Бәхетемде ситтә түгел,
Һиндә табырмын!”
Ошондай матур йыр менән ҡаршыланылар беҙҙе Иглин ҡасабаһындағы 1-се балалар баҡсаһында. Ҙур байрамға йыйылған кескәйҙәр Ватанды һаҡлаусылар көнөн билдәләй.Кисәне ҡарарға атай-әсәйҙәр, олатай-өләсәйҙәр ҙә килгән. Хәрби кейемдәге кескәйҙәр, көслө зат вәкилдәрен етеп килгән байрам менән тәбрикләп, шиғырҙар һөйләне, йырҙар башҡарҙы, күмәк бейеүгә төштө. Яу яланындағы күренештәрҙе лә сәхнәләштерҙе улар: әсәйҙәрҙең улдарын һуғышҡа оҙатыуы, фронттан хат алғандағы кисерештәр, шәфҡәт туташының яралыларҙы хәстәрләүе, еңеү ҡыуанысы... Ошо күренештәрҙе күңеленән үткәреп, ихлас сағылдырҙы балалар.
Тамашаны “Еңеү көнө”, Ватанға арналған йырҙар менән тамамлап ҡуйҙылар. Аҙаҡ етеҙлекте, көстө һынау уйындарында дәррәү ҡатнаштылар. Өлкәндәр рәхмәт әйтеп, ҡәнәғәт булып хушлашты.
– Байрам алдынан бындай патриотик саралар барлыҡ балалар баҡсаларында ла үткәрелде, – тине район хакимиәтенең мәғариф идаралығы етәксеһе Шамил Ғабдуллин. – Мәктәптәрҙә иһә һуғыш ветерандары, хәрбиҙәр менән осрашыуҙар ойошторолдо. Уҡыусылар шулай уҡ музейҙарға сәйәхәт ҡылды, ҡаһармандарҙың һәйкәленә сәскә һалды. Ғөмүмән, йәш быуын вәкилдәрен тарихыбыҙға ихтирамлы, илһөйәр итеп тәрбиәләргә тырышабыҙ. Ата-әсә лә был маҡсатта ярҙамынан айырмай.
Әйткәндәй, 1-се балалар баҡсаһы – Иглиндағы тәүге кескәйҙәр учреждениеһы. Ҙур тарихы булған тәрбиә усағы 300-гә яҡын сабыйҙы һыйындырған. Мәғариф идаралығында әйтеүҙәренсә, ҡасабала балалар баҡсаһында урын етмәү мәсьәләһе хәл ителгән тиергә лә була. Тиҙҙән, март башында, йәнә бер кескәйҙәр учреждениеһы сафҡа инәсәк.