Германияның Лейпциг ҡалаһындағы Нәсүр Йөрөшбаевтың “Атайым тауышы” һәм “Ике тотҡон: Йәүит һәм Вальтер” документаль фильмдарын күрһәткәндәр.Сараны ҡалалағы Йәһүд йәмәғәт үҙәге менән Германияла йәшәгән башҡорт режиссеры Нәсүр Йөрөшбаев ойошторған.
– Фильм ҡарарға абруйлы шәхестәр – фән докторҙары, профессорҙар, сәнғәт эшмәкәрҙәре, матбуғат вәкилдәре килде, – тине яҡташыбыҙ. – Берәү ҙә битараф ҡалманы. Тамаша тамамланғас, әүҙем фекер алышыу башланды. Был минең өсөн көтөлмәгән хәл булды.
Тамашасылар фильмдарҙың юғары сифатын һәм ҡыҙыҡлы йөкмәткеһен билдәләгән. Күптәр режиссерға бүләк тапшырған.
Әйткәндәй, “Ике тотҡон: Йәүит һәм Вальтер” фильмын “Башҡортостан” киностудияһы Германияның “Gaina Media” студияһы менән берлектә төшөргән. Ул Бөйөк Еңеүҙең 70 йыллығына арналған. Фильмда ике тотҡон – Йәүит менән Вальтерҙың әсирлектәге тормошо сағыла.
Авторҙың ике фильмы ла 2014 һәм 2015 йылдарҙа “Көмөш Аҡбуҙат” халыҡ-ара милли һәм этник кино фестивалендә ҡатнашҡан.
Л. ДӘҮЛӘТБӘКОВА, Д. ТӘЛҒӘТОВА әҙерләне.