Башҡортостан Матбуғат һәм киң мәғлүмәт саралары агентлығының киңәйтелгән коллегия ултырышында тармаҡтың былтырғы эшмәкәрлегенә йомғаҡ яһалды, ағымдағы йылға бурыстар билдәләнде. Унда республика Хөкүмәте Премьер-министры Рөстәм Мәрҙәнов та ҡатнашты.
– Киң мәғлүмәт саралары, башҡа өлкәләр кеүек, әлеге еңел булмаған иҡтисади шарттарға яраҡлашырға тейеш. Беҙ барыбыҙ ҙа бер дәүләт мәнфәғәттәренә хеҙмәт итәбеҙ, – тине Рөстәм Хәбиб улы һәм был йәһәттән мөмкинлектәр ту­раһында, бурыстар хаҡында һөйләне.
Сарала Матбуғат һәм киң мәғлүмәт саралары агентлығы етәксеһе Борис Мелкоедовтың, телевидение, радио тапшы­рыуҙары һәм матбуғат баҫмалары редакциялары мөхәррирҙәренең сығыштары тыңланды. Заманса техник алымдарҙы үҙләштереү, электрон мәғлүмәт системаларын үҫтереү, сығымдарҙы ҡулайлаш­тырыу һәм башҡа мөһим мәсьә­ләләр күтәрелде. Мәғлүмәт биреүҙәге уңышлы ысулдар, журналист һөнәренең абруйы хаҡында ла фекер алышыу булды, үҙ-ара тәжрибә уртаҡлашып эшләү мөһимлеге билдәләнде, киләсәккә йүнәлештәр асыҡланды.