Бөгөн көндөҙгө сәғәт 12-лә Ағиҙелдең һул яҡ ярында, “Ҡояшлы” пляжы эргәһендә, Рәсәй киноһы йылына һәм “Спорт наркотиктарға ҡаршы” акцияһына арналған “Киров саңғы юлы-2016” фестивале уҙғарыла.

Баш ҡаланың Киров районындағы предприятие, ойошма һәм уҡыу йорттары вәкилдәре саңғыға баҫасаҡ. Шулай уҡ мини-футбол, хоккей, эстафета һәм башҡа ярыштар уҙғарыла.
Иртәгә иһә бындай сара Өфөнөң “Ҡашҡаҙан” паркында ойошторола. Унда Өфөнөң Октябрь районы вәкилдәре ҡатнаша. Байрам көндөҙгө сәғәт 2-лә башлана.
19 февралдә Затон биҫтәһендәге “Водник” стадионында саңғы ярышы үткәрелә. Ҡатнашыусылар дүрт төркөмгә бүленәсәк. Тәүгеһенә – дөйөм белем биреү учреждениелары уҡыусылары, икенсеһенә – студенттар, өсөнсөһөнә – предприятие һәм ойошмалар хеҙмәткәр­ҙәре, дүртенсеһенә иһә учреждение етәкселәре, спорт ветерандары инәсәк.