Мәскәүҙә Башҡортостан Башлығы Рөстәм Хәмитов “Берҙәм Рәсәй” партияһының XV съезы эшендә ҡатнашты.

Съездың пленар ултырышын асып, партия рәйесе, Рәсәй Хөкүмәте Премьер-министры Дмитрий Медведев, “Берҙәм Рәсәй” — президенттың сәйәси ресурсы, һәм ул яңы сәйәси циклға ышаныслы аяҡ баҫа”, — тип билдәләне.
Партия етәксеһенең фекеренсә, 2016 йылғы һайлауҙа еңеү яулау “Берҙәм Рәсәй” өсөн ҙур әһәмиәткә эйә.
— Илебеҙҙә хәл ярайһы уҡ ҡатмарлы, сәбәптәре барыбыҙға ла билдәле. Проблемалар етерлек, бөтә яҡтан беҙгә баҫым яһайҙар. Шуға күрә уңыштарыбыҙ тураһында отчет биргән осорҙа түгел, ә һынауҙар заманында еңеп сығыу “Берҙәм Рәсәй” өсөн бик мөһим, — тине Дмитрий Медведев. — 2008—2011 йылдарҙағы көрсөктә бирешмәнек, нимә эшләргә кәрәклеген беләбеҙ. Еңеп сығыу өсөн мөмкинлектәр бар. Стратегик яҡтан дөрөҫ һәм һөҙөмтәле ҡарарҙар ҡабул итә, үҙ фекеребеҙҙе яҡлай һәм идеяларыбыҙҙы тормошҡа ашыра алабыҙ.