“Октябрь” яуаплылығы сикләнгән йәмғиәте – Рәсәйҙә төп йәнлекселек хужалығы. Бында 2010 йылдан ҡиммәтле тиреле йәнлек үрсетеү комплексын төҙөү буйынса өҫтөнлөклө инвестиция проекты тормошҡа ашырыла. Инвестицияларҙың дөйөм күләме 725 миллион һум тәшкил итә. Әле ошо аҡсаның 400 миллион һум самаһы үҙләштерелгән. Хужалыҡтың етәксеһе – Александр Анатольевич Авдеев.
Эшмәкәрлектең төп йүнәлеше ҡиммәтле тиреле йәнлектәр үрсетеүгә ҡоролған. Предприятиела аҡ төлкө, шәшке, төлкө, ҡара кеш үрсетәләр. Йылына бында 50 мең данаға яҡын тире етештерелә.
“Октябрь” яуаплылығы сиклән­гән йәмғиәтенең йәнлекселек фермаһы уңышлы эшләй. Инвес­тиция ярҙамында өр-яңы инфраструктура төҙөлгән. Бында 137 шед, йәнлек һуйыу цехы, һыуытҡыс, ҡаҙанлыҡ, мал аҙығы әҙерләү, келәт бүлмәләре бар. Йәнлек үрсетеүселәр өсөн дүрт йорт, ветеринария пункты, санүткәргес һалынған. Тейешле техника, ҡорамалдар (тейәгес, аҙыҡ таратҡыс, автофургон-реф­рижераторҙар) һатып алынған. Шәшке, төлкө тиреләрен тәү башлап эшкәртеү өсөн ҡайһы бер ҡулайламалар Даниянан һәм Финляндиянан килтерелгән. Даниянан шулай уҡ инә шәшкеләр, былтыр көҙ Финляндиянан 800 баш аҡ төлкө һатып алынған.
Күптән түгел ҡаҙанлыҡ эшкә ҡушылған, зәңгәр яғыулыҡ үткә­релгән. Йәнлектәр аҫралған шедтар автоһуғарыу системаһы ме­нән тәьмин ителгән, ер аҫ­тынан һыу торбалары һалын­ған. Яҡ­тырт­ҡыстар тулыһынса мон­таж­ланған. Проектты тормошҡа ашырыу һөҙөмтәһендә Күгәрсен рай-о­нында 120 яңы эш урыны бул­ды­рылған. Йәнлексе­лек фер­маһының 2018 йылда проект ҡеүәтенә сығыуы көтөлә. Бында йылына 120 мең тире етеште­рергә ниәтләйҙәр.
Әле “Октябрь” яуаплылығы сик­ләнгән йәмғиәте – Баш­ҡор­т­останда ветеринария, зоотехния хеҙмәттәре күрһәтеү, аҙыҡ, йән­лектәрҙе аҫрау буйынса ла төп консультант. Ҡиммәтле тиреле йән­лекселек өлкәһендәге кооперация селтәре ауылда мәшғүл­лек­те үҫтереү, экспорт продук­ция­һын арттырыу мөмкинлеген бирә.