“Атай кешенең балаларына ҡалдырған иң ҡиммәтле мираҫы – күркәм тәрбиә”, – тигән пәйғәмбәр Мөхәммәт ғәләйһис-сәләм. Был фекер менән барыбыҙ ҙа, шул иҫәптән бизнеста ҙур уңышҡа өлгәшкәндәр ҙә, килешә. Васыят буйынса ҡалған мал-мөлкәткә генә иҫәп тотоп йәшәп, фәҡирлеккә, хатта берәҙәклеккә дусар булған замандаштарыбыҙ аҙмы ни?Балаларҙы бәләкәйҙән үк эшкә өйрәтергә кәрәк. Мәҫәлән, һәр кемдең өйҙә үҙ бурыстары билдәләнеүе мөмкин: иҙән йыуыу, урам һепереү, ҡар көрәү, һыу ташыу... Был, бер яҡтан, тилберлеккә күнектерһә, икенсенән, яуаплылыҡ тойғоһон арттыра. Үҫмер сағында балағыҙ ваҡытлыса эшкә урынлашһа ла насар түгел. Ҡайһы бер байҙар ҙа ул-ҡыҙҙарына 15-16 йәштән үҙ тырышлығың менән аҡса табыу талабын ҡуя. Исмаһам, көн дә автобуста түләп йөрөрлөк, аҙнаһына бер мәртәбә киноға барып ҡайтырлыҡ. Аҙ булһа ла ярар: иң мөһиме – хәләл көс менән табылған.
Финанс өлкәһендәге уңыш өсөн баланың IQ кимәле әллә ни әһәмиәтле түгел, ти белгестәр. Ябай ғына алым ярҙамында бынамын итеп тәрбиәләй алаһығыҙ буласаҡ эшҡыуарҙы. Стэнфордтан бер ғалим дүрт йәшлектәрҙең алдына кәнфит һалған да кемеһенең уны ашауҙан оҙағыраҡ тыйылып тороуын теркәгән. Аҙаҡ, тиҫтәләрсә йыл үткәс, нәҡ шул сабырҙарҙың тормошҡа нығыраҡ яраҡлашыуын күргән. Улар яҡшы ғаилә ҡорған, мул аҡса эшләгән, карьера яһаған, һаулығын да ҡайғыртырға онотмаған. Ә бына түҙемһеҙҙәр олоғайғансы теләктәрен сикләргә өйрәнмәгән, шунлыҡтан уңышһыҙлыҡҡа йыш осраған.
Бер олигарх балаларын үҙгәрештәргә әҙер булырға, яңы шарттарға тиҙ күнегергә өйрәтеп үҫтерә икән. Ғаилә ағзалары ай һайын йәшәү урынын алмаштыра, ти. Фатирҙарын түгел, бүлмәләрен генә, әлбиттә. Ошолай күсенеп йөрөп, улар баҙар иҡтисады өсөн сыныға, имеш.
Ҡайһы бер байҙар йыш ҡына балаларын “Әгәр атай-әсәй булмаһа?” тигән һорау менән уйландырып ала. Һис тә хилафлыҡ юҡтыр, самаһын белеп кенә ҡабатлаһаң.
Яҡшы белем биреү, спортҡа, дингә ылыҡтырыу иһә үрҙә аталған ысулдарҙың барыһын да алмаштыра ала. Ҡыуанысҡа күрә, беҙҙең башҡорт эшҡыуарҙарының да байтағы хәҙер иң ҙур инвестицияның дөрөҫ тәрбиә икәнлеген ныҡлап аңлай башланы.