Өфө районының Яңы Булгаков ауылында биш етем балаға фатир асҡыстары тапшырылды. Урындағы хакимиәттә аңлатыуҙарынса, әгәр былтыр өй туйлаусылар өсөн көтөлмәгән бүләк фатирҙарҙы йыһазландырыу булһа, был юлы төҙөүселәр торлаҡ майҙанын 48 квадрат метрға тиклем киңәйткән.

Яңы йыл алдынан ошо уҡ райондың Дмитриевка ауылында иҫке һәм авария хәлендәге торлаҡтан күсенеүселәр ҙә йорт туйланы. 25 декабрҙә 19 ғаилә фатир асҡыстары алды. Михайловка ауылында йәнә өс ғаилә яңы өйҙәргә күсте.
Өфө районы хакимиәтенән хәбәр итеүҙәренсә, 2014-2015 йылдарҙа Башҡортостандың граждандарҙы авария хәлендәге торлаҡтан күсереү буйынса адреслы программаһы нигеҙендә 60 ғаиләгә яңы йорттарҙан уңайлы фатирҙар тәҡдим ителгән. Быйыл һәм киләһе йылда Геофизик ҡасабаһындағы иҫке торлаҡта йәшәүсе тағы 70 ғаиләне заманса өйгә күсерергә тейештәр.