Көҙөн данлыҡлы 112-се Башҡорт кавалерия дивизияһының легендар командиры Миңлеғәле Шайморатовҡа тыуған төйәгендә – Ҡырмыҫҡалы районының Шайморатов ауылында — һәйкәл асыу республика тормошонда ҙур ваҡиғаға әйләнде. Башҡортостан халҡы ҡаһарман улына таш һын ҡуйылыуҙы күптән көткәйне. Әммә Ватаныбыҙ азатлығы хаҡына тиңһеҙ батырлыҡ күрһәткән генерал Советтар Союзы Геройы исеменә тәҡдим ителеп, халыҡ тарафынан быны хуплап ярты миллиондан ашыу ҡултамға йыйылыуға ҡарамаҫтан, һаман да тарихи дөрөҫлөктөң тормошҡа ашмауы ғына үкенес.


9 декабрҙә, илебеҙ халҡы Ватан Геройҙары көнөн билдәләгәндә, бер төркөм салауаттар — Салауат башҡорттары ҡоролтайы ағзалары, дин әһелдәре, ҡаланың «Аллағыуат» йәмәғәт ойошмаһы, киң мәғлүмәт саралары вәкилдәре — Ҡырмыҫҡалы районының Шайморатов ауылына юл тотто. Сәфәрҙең маҡсаты, беренсенән, халыҡ батыры һәйкәленә сәскәләр һалып, уның рухы алдында баш эйеү, музейы менән танышыу булһа, икенсенән, данлыҡлы генерал Миңлеғәле Шайморатовҡа Рәсәй Геройы исемен юллауҙы башлау.
— Бындай акция үткәреү мәсьәләһе бөгөн бик әһәмиәтле. Яңыраҡ IV Бөтә донъя башҡорттары ҡоролтайында ла резолюцияға ошо хаҡта бүлек индерелде. Быға тиклем яҡташыбыҙға Советтар Союзы Геройы исемен биреү өсөн ҡултамғалар йыйылды, яңы ынтылыш иһә Шайморатовҡа Рәсәй Геройы исемен бирҙереү маҡсатын күҙ уңында тота. Сара район, ҡала, республика ғына түгел, ил кимәленә сығыр һәм халыҡ изге ниәтте дәррәү күтәреп алыр, тип уйлайым. Уның һөҙөм­тә­һендә тарихи ғәҙеллектең тергеҙе­леренә ышанабыҙ, — тине акцияның башында торған Салауат башҡорт­тары ҡоролтайы рәйесе Сибәғәт Рахманғолов.
Ҡырмыҫҡалы районы хакимиәте башлығы урынбаҫары Ильмира Ғәлиәхмәтова ла халыҡтың башланғысты хупларына шикләнмәй. Сөнки быға тиклем «Комдив Шайморатов. Геройҙың ҡайтыуы» акцияһы барышында 400 меңдән ашыу ҡултамға йыйылған. Шайморатовҡа һәйкәл ҡуйыу идеяһын тормошҡа ашырыуҙа ла йәмәғәтселек ярҙам ҡулы һуҙған.
Әйткәндәй, Салауат ҡалаһы, был сара ваҡытында ҙур әүҙемлек күрһәтеп, республикала иң күп ҡултамға йыйыусылар иҫәбендә булды.
Башҡортостандың төрлө төбәгенән үҙ теләге менән яуға китеүселәрҙән кавалерия дивизияһы төҙөгән, һуңынан Дондан Эльбаға тиклем 4 мең саҡрым данлы юл үткән Миңлеғәле Шайморатовтың Рәсәй Геройы исеменә лайыҡ булыуы республика халҡының һәм унан ситтә йәшәгән милләттәштәребеҙҙең береһендә лә шик уятмай. Тап ул етәкләгән дивизия Тыуған илгә Дан орденының биш тулы кавалерын һәм 78 Советтар Союзы Геройын биргән. Был ул дәүерҙәге башҡа бер генә хәрби берләшмәнең дә тарихында юҡ.
Милли геройыбыҙ Салауат Юлаев исемен йөрөткән ҡала йәмәғәтселеге эште Шайморатовтың тыуған ауылына килеп, уның һәйкәленә сәскә һалыуҙан башланы. Дин әһелдәре доға ҡылды, Герой исемен юллау буйынса изге ниәтте тормошҡа ашыра башлауға фатиха ла бирҙе. Салауаттар батырҙың тыуған ауылындағы ҡыҙыҡлы экспонаттарҙан торған бай музей менән танышып, 3D форматында фильм ҡарағандан һуң Шайморатовтың ҡаһарманлығы тураһындағы иҫтәлектең ҡәҙерләп һаҡланыуына инанды. Ошонда уҡ Салауат вәкилдәре һәм Ҡырмыҫҡалы йәмәғәтселеге ил Президенты Владимир Путинға Миңлеғәле Шайморатовҡа Рәсәй Геройы исемен биреүҙе һорап мөрәжәғәт ҡабул итте.
Халҡыбыҙҙың бөйөк улы, легендар 112-се Башҡорт кавалерия дивизияһы командиры Тыуған илебеҙҙе дошмандарҙан азат итеү, тыныслыҡ хаҡына йәнен аямай, батырҙарса көрәшкән. Башҡорт халҡы өсөн ул һәр ваҡыт герой булды һәм шулай буласаҡ. Шуға күрә Шайморатовтың ҡаһарманлығы дәүләт кимәлендә баһаланып, тарихи ғәҙеллек тантана итеренә өмөт ҙур.