М. Аҡмулла исемендәге Башҡорт дәүләт педагогия университеты студенты Гөлназ Шәмсетдинова Красноярскиҙа уҙғарылған “Азия-Себер һылыуҡайы-2015” халыҡ-ара матурлыҡ һәм таланттар конкурсында еңеп сыҡты.Бәйгенең үҙенсәлеге шунда: унда һылыуҙарҙың һәләттәре, милли йолалар, үҙ халҡыңдың мәҙәниәте һәм рухи ҡиммәттәре менән таныштырыу оҫталығы баһаланды. Быйыл төп титулға төбәк этаптарында еңеп сыҡҡан Тыва, Бүрәтстан, Хакасия, Корея, Шория, Ҡаҙағстан, Ҡырғыҙстан, Татарстан, Украина, Польша ҡыҙҙары дәғүә итте.
Башҡортостандан конкурста Гөлназ Шәмсетдинованан тыш Рита Мөхәмәтйәнова менән Лира Ғәзизова ҡатнашты. Былтыр еңеүсе тажын беҙҙең һылыуҡай Айгөл Сафина яулағайны.