Республика Башлығы Рөстәм Хәмитовтың бойороғона ярашлы, Таһир Ибраһимов Башҡортостан Республикаһы Башлығы Хакимиәте етәксеһе урынбаҫары итеп тәғәйенләнде.

Таһир Әсхәт улы Ибраһимов 1962 йылда Өфөлә тыуған. 1987 йылда СССР Дәүләт именлеге комитетының Ф.Э. Дзержинский исемендәге Юғары мәктәбен тамамлаған. 1982 – 1992 йылдарҙа дәүләт именлеге органдарында хеҙмәт иткән, 1994 йылдан 2003 йылға тиклем Федераль һалым полицияһы органдарында эшләгән. 2003 йылдан – Наркотиктарҙың әйләнешенә контроль буйынса федераль хеҙмәттең Башҡортостандағы идаралығында оператив-техник һәм эҙләү хеҙмәте начальнигы. 2011 йылда ошо хеҙмәттең Башҡортостандағы идаралығы начальнигы урынбаҫары итеп тәғәйенләнгәйне. 2012 йылдан 2014 йылға тиклем идаралыҡ начальнигы вазифаһын башҡарҙы.