Башҡортостандағы сауҙа кәштәләрен Әрмәнстандағы эшкәртеү предприятиеларынан килтерелгән аҙыҡ-түлек тулыландырасаҡ.

Республиканың Сауҙа һәм ҡулланыусылар хоҡуғын яҡлау буйынса дәүләт комитетында хәбәр итеүҙәренсә, төбәгебеҙҙән делегация Кавказда булып, ошо йәһәттән һөйләшеп ҡайтҡан. Улар емеш-еләк, йәшелсә һәм балыҡ эшкәртеү буйынса “Двин Гудс” холдингында, “Арарат” комбинатында, “Бекон” фирма­һында, “Спайка” һәм “Евротерм” логистика предприятиеларында булған.
Ведомствола әйтеүҙәренсә, Әрмәнстанды Евразия иҡтисади союзының таможня протоколына ҡушыу һөҙөмтәһендә тауар әйләнеше яйға һалынды. Беҙҙең төбәк баҙарына конкурентлыҡ ҡеүәһенә эйә булған байтаҡ аҙыҡ-түлек килтереләсәк. Әр­мәнстан тауарҙарын Татарстанға, Пермь крайына, Силәбе һәм Свердловск өлкәләренә лә сығарыу мөмкинлеге ҡарала.