Яңы йылды ҡаршылар алдынан һәр бала тиерлек Ҡыш бабайға хат яҙа. Кемдер уйынсыҡ һорай, берәүҙәре киләһе йылда тик “бишле” алыуын теләй, бәғзеләре баш ҡаланы күреү хыялы менән яна. Ә бына шул үтенес менән конвертты ҡайҙа ебәрергә? Үткән аҙнала ғына гәзитебеҙ республикала Ҡыш бабай резиденцияһы булдырыу мәсьәләһен күтәреп сыҡҡайны...
Яңы йылда беҙҙең Ҡыш бабай Ишембай районында Торатау итә­гендә йәшәйәсәк. Был турала рес­пуб­ликабыҙҙың Эшҡыуар­лыҡ һәм туризм буйынса дәүләт комитеты рәйесе Вячеслав Ғиләжетдинов бел­дерҙе. Иң күңелле байрамды билдәләү өсөн “Мөғ­жизәле Яңы йыл Башҡортостаны” проек­ты әҙерлән­гән. Йәнтөйәгебеҙгә турис­тарҙы йә­леп итеү маҡсатынан рес­пуб­ли­ка­быҙ буйлап төрлө маршруттар булды­рылған. Ә инде баш ҡалабыҙ Өфөлә 1 – 10 ғинуарҙа ғаи­лә менән күңел асыу өсөн ҡыҙыҡлы прог­раммалар әҙерләнгән.
Атап әйткәндә, ҡала буйлап метробус йөрөйәсәк. Ул Өфөнөң ҡы­ҙыҡлы урындарына, музейҙарға һәм мәҙәниәт һарай­ҙарына алып бара­саҡ. Ә инде маршруттағы ирек­мәндәр һеҙгә ҡайҙа матур итеп ял итергә кәңәш бирер.
Быйылдан башлап Башҡортос­танда Ҡыш бабай йорто булыуы – балалар өсөн шат­лыҡ­лы күренеш. Әйткәндәй, уны үҙ ерендә төплән­дерер өсөн күп райондар дәғүә ит­кән. Тик ишембайҙарға етеүсе та­был­ма­ған.
Байрам мәлендә Торатау итә­ген­дә уның тир­мәһен күреп, үҙе менән яҡын­дан ара­лашыу мөмкинлеге лә була­саҡ. Унда мил­ли аш-һыуҙы тәмләү, суве­нирҙар алыу, йыр-моң менән күңел асыу ҙа ҡаралған. Ҡунаҡтарҙы баш ҡаланан Ҡыш бабайҙың яңы төйәгенә махсус транспорт йөрөтәсәк.
Ә инде хат яҙырға теләгәндәргә ҡыш хужаһының адресын бирәбеҙ: Ишембай районы, Урман-Биш­ҡаҙаҡ ауылы, “Ҡыш бабайға”.