Быйылғы һауа шарттарында әллә ни мул уңыш алынмағандыр ул тип шикләнеүселәрҙе тынысландырабыҙ: Башҡортостанда 1 миллион тоннанан ашыу шәкәр сөгөлдөрө йыйылған. Гектар ҡеүәте — уртаса 260 центнер. Республика Ауыл хужалығы министрлығының матбуғат хеҙмәтендә билдәләүҙәренсә, быйылғы күрһәткестәр былтырғыға ҡарағанда күпкә яҡшыраҡ. “Себеш”тәрҙе һанағанда Баҡалы районындағы “Чернов” крәҫтиән (фермер) хужалығының тос өлөшөн дә билдәләргә кәрәк. Предприятие бынан бер нисә йыл элек кенә эш башлаған тип әйтмәҫһең дә: ҡиммәтле техника, заманса агрегаттар, юғары уңыш күрһәткестәре, ҙур-ҙур пландар. Әле яңыраҡ ҡына 32 миллион һумға “ROPA Panther” сөгөлдөр йыйыу машинаһын һатып алғандар. Бындай техника ошоғаса Рәсәйҙә Алтай крайында ғына булған. Икенсеһе — Баҡалыла. Ҡыҫҡаһы, мөмкинлектәр бар, шуға күрһәткестәр ҙә шәп. Былтыр, мәҫәлән, хужалыҡ “татлы тамыр”ҙы 800 гектар майҙанда ғына үҫтереп алһа, быйыл ошо культура өсөн 2000 гектар ер бүленгән. Киләһе миҙгелгә майҙанды ике тапҡырға арттырырға иҫәп тоталар.
— Ауыл уңғандарҙы ярата. Бөгөн тир түкмәйенсә етеш йәшәп булмай. Әгәр беҙҙең яландарҙы ҡиммәтле техника иңләй, хеҙмәткәрҙәребеҙ юғары эш хаҡы ала икән, тимәк, тырышлығыбыҙ юҡҡа түгел, — ти фермер Вячеслав Чернов. — Мин дә әҙергә килеп ултырманым. Аксен ауыл хужалығы техникумын тамамлағас, республика хужалыҡтарында практика үттем, эшләргә өйрәндем. Ауыл хужалығы ер эше менән генә сикләнмәй ул. Бында иҡтисадсы ла, ойоштороусы ла, хатта психолог та булырға тура килә.
Ысынлап та, һуңғы йылдарҙа ауыл хужалығы тармағы яйлап ҡына ҡул көсөнән индустриаль алымдарҙы үҙләштерә. Хәтерегеҙҙәлер, әле нисә йыл элек кенә шул уҡ сөгөлдөрҙө лә ҡар яуғанға тиклем йыйып, мәктәп уҡыусыларын да йәлеп итеп мәж килә торғайныҡ. Ә хәҙер нисек? Мәҫәлән, бөгөн “Чернов” хужалығының яландарын тәүлегенә 120 гектар майҙанды эшкәртеү ҡеүәтенә эйә сит ил машиналары иңләй. Һөҙөмтәлә килем дә юғары. Элек былар хыялда ғына ине. Хыялдар тормошҡа аша...