Башҡортостанда “Ветеран көндәлеге. Һуғыштың уйлап сығарылмаған тарихы” проекты әүҙемләшә. Тәүге китапҡа һуғыш тураһында 70-тән ашыу ваҡиға инһә, баҫманың рәсми сайтында ветерандарҙың 500-гә яҡын хәтирәһе урын алған. Йыйынтыҡ менән таныштырыу сараһы 10 ноябрҙә республиканың Йәштәр сәйәсәте һәм спорт министрлығында уҙғарыла.

Әйткәндәй, проект китап нәшерләү маҡсатында Бөйөк Ватан һуғышы ветерандарының хәтирәләрен йыйыуға йүнәлтелә. Сараны ойоштороусыларҙың фекеренсә, акция Көнбайыш сәйәсмәндәренең тарихты үҙгәртеп күрһәтергә, Рәсәйҙең Икенсе донъя һуғышында еңеүҙәге әһәмиәтен кәметергә маташыуына кәртә ҡуйыу мөмкинлеген бирәсәк. Проектта теләге булған һәр кем ҡатнаша ала. Бының өсөн сайтта теркәлергә кәрәк.