“Мирзәйет” яуаплылығы сикләнгән йәмғиәтен һәр яҡтан да өлгө итеп ҡуялар районда. Үҫемлекселектә лә, малсылыҡта ла һынатмай ул. Ауыл хужалығы һәм эшкәртеү сәнәғәте хеҙмәткәрҙәре байрамы уңайынан ойошторолған тантанала иң күп бүләк ошо ойошма вәкилдәренә тапшырыла икән.

Хужалыҡ уңғандары менән дан тота. Хәйер, хеҙмәткәр­ҙәр­ҙең йорттары ла төҙөк, ихаталары ла тәр­тип­тә. Шулай бул­­ғас, һәр береһе өлгөр һәм егәрле, тип әйтергә нигеҙ бар.
– Тәртип тупһанан башлана, – тип башланы һүҙен “Мир­зә­йет” хужалығы рәйесе Рәфис Хурамшин. – Шулай булмай ни, хәҙер бит артта һөйрәлеүселәр юҡ беҙҙә, “иртәгәһен ишәк ҡайғыртҡан” принцибы менән берәү ҙә йәшәмәй.
Йәмғиәттең өҫтөнлөклө йү­нә­леше – малсылыҡ һәм үҫем­лек­се­лек. Етәкселек йыл­­дан-йыл һыйыр малын арт­тырыуҙы маҡсат иткән. Бында дүрт йөҙ башҡа яҡын мал иҫәпләнә, шуның өстән бер өлөшө – һауын һыйыры. Һөттөң кәмеүенә юл ҡуйылмай. Әйт­кән­дәй, аҡты “Баҡалыһөт” йәм­ғиә­тенә тапшыралар.
Хеҙмәткәрҙәрҙең эшен еңе­ләйтеү өсөн яна хужа. Улар күп­тән инде заманса яңы алымға күскән. Ошо маҡсатты күҙ уңында тотоп, һөтсөлөк фермаларында әллә күп­ме ремонт эштәре башҡа­рылған.
Киләсәккә пландары тура­һында ла һораштыҡ. Рә­фис Фазыл улы билдәләүенсә, бер нисә йүнәлештә эш итеү хуж­а­лыҡты һәр йәһәттән дә үҫтерә, тор­мош менән бергә ат­ларға өйрәтә, халыҡҡа эш урындарын арттырыу мөмкин­леген бирә. Көндәлек һауым бөтәһе 1 120 литр­ҙан ашыу икән, был улар өсөн сик тү­гел, шул уҡ ваҡытта сәсеүлек май­­ҙанын да киңәйтеп баралар. Йәнә бер ҡыуанысы менән уртаҡ­лашты әңгәмәсем: быйыл мал аҙы­ғы ифрат күп әҙерләнгән. Ғә­ҙәт­тәгесә, һәр кем тырышлыҡ күрһәткән.
Алдынғылар исемлеген ту­лы­ландырған ферма мөдире Николай Васильцов, һауын­сылар Зәнәфиә Бәҙретдинова, Зөлфиә Вәлиева, Гөлсәсәк Миң­леханова, малсылар Рә­фис Сафуанов, Наил Ибраһи­мов, Йәмил Ғәйнетдинов, шу­лай уҡ ком­байнсылар Ринат Йосопов, Зөлфәт Хужин, Рәил Ғәбдрәүпов, Айрат Гәрәев, Ра­дик Нәбиуллин, Радик Шәкү­ров, Айҙар Исмәғилев һәм бү­тәндәр – хужалыҡтың төп көсө.
Рәфис Хурамшин, “хеҙмәт­тән ял таба йөрәк”, тип ихлас йылмайҙы беҙҙең менән хуш­лашҡанда. Ысынлап та уның менән тулыһынса килешергә мөмкин.